Dende o organismo provincial tamén demandan a reposición da estrada do Courel

No último Pleno da Deputación de Lugo, celebrado o pasado martes 26 de marzo, aprobouse por maioría a proposta presentada polo Grupo Provincial socialista, co apoio do BNG, para esixir á Xunta de Galicia medidas urxentes na reposición da estrada autonómica LU-651, así como para a posta en valor das antigas minas de antimonio de Santa Eufemia.
A Voceira provincial socialista, Pilar García Porto, denunciou a lentitude e falta de planificación da Xunta na solución dos problemas derivados do afundimento da estrada, ocorrido en marzo de 2022. García Porto criticou o desinterese da Xunta, sinalando os xenerosos prazos de execución concedidos pola Conselleira de Infraestruturas e Mobilidade, Ethel Vázquez, mentres se reclamaba axilidade a outras administracións para resolver cuestións de mobilidade máis complexas.
A deputada subliñou que as intencións da Xunta ían máis alá de arranxar a estrada, acusando o goberno galego de querer utilizar as antigas minas de antimonio de Santa Eufemia como escombreira da obra, o que suporía un dano irreparable ao patrimonio industrial, cultural e arqueolóxico da provincia.
García Porto destacou o alto valor das antigas minas, que contan con galerías, fornos de cal e vagonetas, así como posibles poboacións de morcegos, e resaltou o seu significado xeolóxico al estar nas estribacións do Xeoparque do Courel.
A Deputada lamentou o desinterese da Xunta polo rural e criticou a súa actitude de deixar illadas as zonas afectadas polo afundimento da estrada, así como a súa falta de respecto ao patrimonio natural e cultural da provincia.•