O sector turístico da Ribeira Sacra celebra os bos resultados a pesar das adversidades climatolóxicas
Desde o Consorcio de Turismo Ribeira Sacra, informan sobre os datos recollidos ata o de agora, que indican unha Semana Santa exitosa para o sector turístico, a pesar das condicións climatolóxicas desapracibles. Segundo as cifras, a ocupación durante a Semana Santa foi satisfactoria, e a tendencia é positiva para o resto da tempada. Desagregando os datos, observamos que durante os días centrais da Semana Santa, que abranguen do 27 de marzo ao 1 de abril, a ocupación foi notabelmente alta en todos os tipos de aloxamento. Os hoteis de 3 e 4 estrelas alcanzaron unha ocupación do 82%, superando as previsións iniciais. O turismo rural, as vivendas turísticas e de uso turístico, así como o resto de aloxamentos, tamén rexistraron cifras positivas, coa ocupación total chegando ao 87%.
Nos días previos á Semana Santa, a ocupación tamén foi considerable, a pesar de ser algo inferior aos días centrais. Os hoteis de 3 e 4 estrelas alcanzaron unha ocupación do 74%, mentres que o turismo rural, as vivendas turísticas e de uso turístico, e o resto de aloxamentos tamén rexistraron cifras respectables, coa ocupación total chegando ao 67%. É importante destacar que, a pesar das pésimas condicións meteorolóxicas previstas, a Semana Santa superou as expectativas. A choiva e o mal tempo non afectaron significativamente á afluencia de visitantes, o que indica unha alta demanda turística na Ribeira Sacra. As políticas de cancelación flexíbeis e as reservas anticipadas contribuíron á estabilidade do sector.
RUTAS FLUVIAIS
O Presidente da Deputación de Lugo, José Tomé Roca, subliñou o éxito das rutas fluviais pola Ribeira Sacra ao inicio desta tempada 2024, que atraeron preto de 2.200 viaxeiros durante a Semana Santa. Destacou o impacto económico directo no sector turístico, hostaleiro e comercial, así como o potencial de promoción que estes eventos representan para a comarca e a provincia.
Para a tempada completa, que se estende ata decembro, xa se rexistraron máis de 12.000 reservas, demostrando unha demanda continua e un interese estable nos vindeiros meses. As previsións para o resto do mes indican unha ocupación do 70%, o que confirma a tendencia crecente na planificación anticipada das viaxes e o éxito sostido do destino turístico da Ribeira Sacra.•
Cargando ...
