Os orzamentos aprobados provisionalmente polo Concello de Quiroga para este 2024 atópanse en exposición pública ata o vindeiro 27 de maio, despois da súa publicación no Boletín Oficial da Provincia. Durante este período, os cidadáns poderán presentar alegacións, de non ser o caso, serán publicados para a súa aprobación definitiva.
Na sesión plenaria do 26 de abril, a Corporación municipal de Quiroga aprobou uns orzamentos que ascenden a 5.497.099 €, case 800.000 € máis que no ano anterior.
Estes orzamentos, aprobados co voto favorable de Independentes por Quiroga, PSdeG-PSOE e BNG, e coa abstención do Partido Popular, recollen unha inversión de máis de 700.000 €, destinada principalmente á reparación de vías locais, rúas, camiños e accesos a núcleos, así como á pavimentación. Tamén se inclúe a realización dunha auditoría da Rede de abastecemento de auga.
Outros proxectos incluídos nestes orzamentos son as melloras na eficiencia enerxética na iluminación pública e na casa do concello, a restauración de sendeiros da Rede Natura e a mellora da sinalización e dos recursos turísticos. Ademais, contémplase a adquisición dun tractor para desbroces.•
Cargando ...
