O Presidente da Deputación de Lugo, José Tomé Roca, visitou a pasada semana en Monforte de Lemos a oficina móbil do Acelera PEMES, programa co que a institución provincial está a ofrecer asesoramento e soporte gratuíto en materia de transformación dixital ás empresas e autónomos da provincia. Desde o inicio deste proxecto, preto de 2.000 PEMES e autónomos recibiron apoio en dixitalización para modernizar os seus negocios, gañando eficiencia e competitividade. José Tomé reuniuse co persoal da unidade móbil e destacou que esta é a segunda rolda de visitas da iniciativa, durante a que 7 axentes dixitais farán diferentes paradas en máis de 50 concellos ata o vindeiro 20 de xuño. O Presidente salientou o impacto positivo especialmente nos concellos de menos de 5.000 habitantes, onde se están focalizando os esforzos, detectando a maior necesidade. Dende o inicio do programa, a Deputación asesorou máis de 1.750 empresas e atendeu 4.000 consultas, “o que pon de manifesto o grande interese que está a xerar para as pequenas e medianas empresas da provincia”, sinalou Tomé. A iniciativa busca incrementar a competitividade, produtividade e eficiencia das empresas, abrindo novas oportunidades de negocio e reforzando o apoio ao tecido produtivo para fixar poboación no rural.•
Cargando ...
