A solidariedade e a conciencia social uníronse en Chantada nunha loita colectiva contra o cancro. No pasado mes de decembro, a directiva da Asociación Chantada contra o cancro anunciaba a súa decisión de rematar a súa etapa. Tras sete anos de actividade, a posibilidade de desaparición pendía sobre esta organización chantadina, que nacera co obxectivo de compartir experiencias, apoiar a doentes e ás súas familias, e promover hábitos de vida saudables.
Conscientes da importancia do traballo iniciado pola primeira presidenta e fundadora, Jesusa, e da necesidade de continuar co legado, unha nova directiva conformada por catro mulleres asumiu as rendas no comezo do 2024. Ana López (Presidenta), Salud Sánchez (Tesoureira), Elena Pavón (Secretaria) e Eva R. Argiz (Vogal) comprométense a manter viva a esencia da asociación e a seguir axudando á comunidade. A pesar dos desafíos, a actividade de Chantada contra o cancro non se detivo. No pasado mes de marzo, organizaron un concerto solidario de acordeón e, recentemente, impartiron charlas informativas sobre enfermidades de transmisión sexual nos institutos locais. O obxectivo é claro: informar e concienciar á mocidade sobre os riscos asociados ao virus do papiloma humano (VPH) e a súa relación co cancro, promovendo así a prevención e a saúde. Máis alá da labor divulgativa, a asociación tamén ofrece unha ampla gama de servizos para os pacientes e as súas familias. Dende atención psicolóxica ata asesoramento nutricional e actividade física, Chantada contra o cancro procura garantir que os doentes teñan acceso a un apoio integral e personalizado. Grazas á colaboración de profesionais e establecementos locais, estes servizos están ao alcance de todos, contribuíndo así a reducir as desigualdades no acceso á atención sanitaria. •
