Galicia celebra un fito significativo no seu panorama laboral, cun dato histórico na cifra de persoas en situación de desemprego: 126.334 persoas rexistradas como desempregadas é o menor número desde 1996. O Conselleiro de Emprego, Comercio e Emigración, José González, expresou unha satisfacción cautelosa ante estes datos, enfatizando a importancia de seguir traballando para mellorar o mercado de traballo e equilibrar oferta e demanda.
A nosa comunidade é a que máis reduciu o desemprego en termos relativos con respecto ao ano pasado e a terceira en termos absolutos, cunha caída do 9,34%, máis do dobre do declive rexistrado a nivel nacional. A redución tamén se verifica mensualmente, cunha baixada do 2,08%, abrangendo todas as provincias galegas, as sete principais cidades e todos os sectores de actividade. A tendencia positiva esténdese aos grupos con máis dificultades de emprego. O número de desempregados con menos de 30 anos (13.851) é o máis baixo para un mes de abril desde 2006, mentres que o número de mulleres desempregadas (73.339) alcanza un mínimo histórico desde 1996. Ademais, o número de desempregados de longa duración (63.068) é o menor desde 2008. A análise sectorial mostra que a construción lidera a redución do desemprego (-12,87%), seguida pola industria (-12,54%), polo sector primario (-11,32%) e polos servizos (-8,93%). Con respecto ás afiliacións, Galicia continúa a crear emprego, cunha suba nas cotizacións reflectida tanto con respecto a hai un ano (+1,72%) como na evolución mensual (+0,63%). A comunidade galega conta con 1.068.335 afiliacións, unha cifra superior á rexistrada hai 15 anos (abril 2009). Desde a nova Consellería de Emprego, Comercio e Emigración consideran que hai que conseguir un emprego de calidade cun mercado laboral dinámico e inclusivo e un crecemento económico intelixente; garantir a competitividade do tecido comercial, asegurando a súa viabilidade e impulso e o relevo xeracional; e redobrar a aposta polo retorno dos e galegos no exterior para atraer talento. O conselleiro José González salienta a importancia de atraer investimentos ao ecosistema emprendedor galego, promovendo unha intensa política de apoio ao investimento no tecido produtivo. Destaca a necesidade dunha colaboración público-privada para deseñar medidas e políticas activas de emprego axeitadas, involucrando tanto o sector produtivo como as forzas sindicais. Neste contexto, o Conselleiro destaca os esforzos da Xunta en promover o emprendemento.
XUNTANZAS COS AXENTES SOCIAIS
O conselleiro tamén atópase nun proceso de escoita activa cos axentes sociais e económicos de Galicia para recoller as súas propostas e poder deseñar a través do diálogo as mellores medidas para avanzar no progreso de Galicia. Nesta liña, cabe citar a xuntanza que vén de manter co secretario xeral de UGT-Galicia, José Antonio Gómez esta mesma semana. En palabras de González, o Goberno galego traballa da man dos axentes económicos e sociais para seguir a impulsar o emprego, o comercio e o retorno dos galegos no exterior que así o desexen para que Galicia siga prosperando. Pola súa banda, o Secretario Xeral de UGT-Galicia transmitiu ao titular de Emprego a importancia de continuar a mellorar os indicadores laborais, pois a pesar dos datos favorables do desemprego en Galicia, que mostran unha aproximación ás taxas de afiliación á Seguridade Social do ano 2008, aínda hai aspectos por mellorar, como as taxas de actividade e a parcialidade involuntaria, co obxectivo de avanzar cara a un escenario de pleno emprego de calidade. En canto ao diálogo social, Gómez destacou a necesidade de reforzar a súa transversalidade, especialmente en áreas como as políticas activas de emprego ou as políticas sociais. Na reunión, o Secretario Xeral de UGT-Galicia tamén respaldou a proposta da Xunta de traballar nun pacto pola industria e a enerxía. Neste contexto, subliñou a importancia dun cambio de modelo produtivo sostible, no que a industria, especialmente os sectores de alto valor engadido, xoguen un papel protagonista. Destacou a necesidade dunha estratexia enerxética que aproveite as potencialidades de Galicia para enfrontar os novos desafíos enerxéticos, sempre respectando o medio ambiente.
Por último, o Secretario Xeral de UGT-Galicia instou ao conselleiro de Emprego a traballar en conxunto cos axentes implicados para solucionar os desaxustes entre a oferta e a demanda no mercado laboral galego.•
Cargando ...
