A marcha estivo organizada pola Asociación Motorista Lucense, e puntúa para a Copa de España de Mototurismo
Moteiros de todo o estado participaron o pasado sábado, 11 de maio, na Ruta Castrexa, unha proba de mototurismo organizada pola Asociación Motorista Lucense coa colaboración das áreas de Deportes e Turismo da Deputación de Lugo.
Na proba, que puntuou para a Copa de España de Mototurismo, as moteiras e moteiros tiveron que completar un percorrido de 336 quilómetros polas comarcas da Ulloa, Terras de Lemos e Ribeira Sacra. Os participantes puideron escoller o itinerario máis axeitado ás súas características de condución, pasando polos controis de paso indicados pola organización nos que tiveron que parar e selar os seus pasaportes de ruta: Ventas de Narón (Portomarín), Palas de Rei, Antas de Ulla, Limiñón (Chantada), Ribas de Sil, Augas Santas (Pantón), Becerreá e Lugo, que foi o punto de saída e chegada.
Na presentación da proba, o vicepresidente da Deputación de Lugo, Efrén Castro, valorou “o traballo realizado pola Asociación Motorista Lucense para a consolidación desta proba, que apoiamos desde a súa posta en marcha hai catro anos” e destacou “as sinerxias entre deporte e turismo, especialmente en modalidades como o mototurismo, unha disciplina en auxe que, con esta proba, proxecta o patrimonio natural e cultural das comarcas do sur de Lugo a través da experiencia de moteiras e moteiros de todo o Estado”. No acto tamén participaron os representantes da entidade organizadora, Aurelio Nóvoa e Mónica Lopez, e o deputado de Promoción Económica e Social Pablo Rivera.•
