A pasada semana o Hotel Aurea Palacio de Sober acolleu o “Encontro de Sober”, unha nova iniciativa que busca fomentar o progreso no ámbito rural. Organizado polo CESUGA, estas xornadas tratan de promover o desenvolvemento do medio rural a través do diálogo entre industria, agro, universidade e sector público. No acto inaugural participaron a subdelegada do Goberno en Lugo, Isabel Rodríguez Rodríguez, o deputado provincial de Promoción Económica e Social, Pablo Rivera, a conselleira de Medio Rural, Mª José Gómez, a edil de Sober, Raquel Arias, o presidente da Confederación de Empresarios de Lugo, Eduardo Valín, e o presidente do Consello Reitor de CESUGA, Venancio Salcines. Todos agradeceron a creación destas xornadas destacando a importancia de explorar as sinerxías entre os distintos sectores para dinamizar o rural galego.
Con máis de 60 expertos e unha audiencia de máis de 400 persoas, o “Encontro de Sober” abordou temas clave para o desenvolvemento rural, como a tecnoloxía, sustentabilidade, emprego e emprendemento. Durante dúas xornadas, os participantes tiveron a oportunidade de debater e intercambiar ideas para promover a innovación e o progreso no rural galego.
A subdelegada do Goberno, Isabel Rodríguez destacoua importancia do diálogo e da colaboración entre os diferentes sectores, Rodríguez subliñou a necesidade de traballar en conxunto para materializar o potencial do rural en proxectos que dinamicen tanto o ámbito económico como o social.
As mesas temáticas de acceso gratuíto abriron as portas á reflexión e ao intercambio de coñecementos, ofrecendo un espazo único onde a Galicia empresarial, a industrial e a rural puideron atopar vínculos e inspiración para colaboracións futuras.
PRESENZA DAXUNTA DE GALICIA
No encontro tamén participaron a conselleira do Medio Rural, María José Gómez, e o conselleiro de Emprego, Comercio e Emigración, José González
María José Gómez, titular do Medio Rural, tivo un papel destacado na inauguración do evento e posteriormente na mesa redonda titulada “Sen corazón non hai corpo: o sector lácteo en Galicia”. Nesta mesa, Gómez destacou os retos futuros do sector lácteo e do agro galego en xeral. Subliñou a necesidade de seguir impulsando a remuda xeracional e fomentando o traballo da industria agroalimentaria, facendo especial referencia ás iniciativas da Xunta para apoiar a incorporación de mozos e a formación dos novos traballadores do sector. As axudas da Consellería para investimentos produtivos e a comercialización dos produtos agrícolas tamén foron resaltadas como ferramentas fundamentais para o desenvolvemento do rural galego.
Gómez fixo fincapé na importancia da mobilización e ordenación da terra agraria, sinalando os avances realizados ata o momento e as metas futuras neste eido. Destacou tamén a relevancia do sector lácteo en Galicia, que lidera a producción a nivel nacional e representa unha parte importante da economía galega.
Pola súa banda, o conselleiro de Emprego, Comercio e Emigración, José González, abordou os desafíos e oportunidades do emprego no rural galego no seu relatorio “Emprego no rural galego: retos e oportunidades”. González destacou a importancia da colaboración público-privada e do diálogo coa sociedade civil para consolidar negocios e emprego de calidade no rural. Facendo referencia aos datos que reflicten a diminución do desemprego no sector primario, González subliñou a necesidade de seguir traballando en políticas que fomenten un mercado laboral accesible e dinámico no rural galego.
Así mesmo, referiuse á Rede de polos de emprendemento e apoio ao emprego que conta xa con 13 centros activos con especial incidencia no rural e que ten atendido arredor de 1.800 iniciativas empresariais nos case dous anos que leva activa.
Por sectores, segundo dixo, predominan os servizos, seguidos da hostalaría e das actividades de comercio. No marco desta Rede, vénse de habilitar unha web -salientou- con microguías de emprendemento para orientar sobre tipos de negocio para poñer en marcha, incluída a transmisión de empresas que vaian pechar para garantir a súa continuidade.
A DEPUTACIÓN REIVINDICA O RURAL
O Deputado de Promoción Económica e Social, Pablo Rivera, tamén participou no foro económico O “Encontro de Sober: diálogos rural-industria”, defendendo a importancia de manter no rural servizos públicos como colexios e centros de saúde para asentar poboación no rural. “Afrontamos desafíos que requiren unha visión política comprometida para impulsar un desenvolvemento sostible do noso territorio, o noso rural está cheo de oportunidades e temos que apostar por iso dende as administracións públicas”, aseverou.
“Dende a Deputación reivindicamos a potencialidade do rural como fonte de produtos de calidade e como soporte dunha oferta turística sostible ligada ao coidado do medio ambiente, como parte indisoluble do patrimonio cultural, do Camiño de Santiago ou como plató de cine e de series de sona. Pero un rural vivo os 365 días do ano require servizos públicos de calidade os 365 días do ano, e ese é un compromiso que as administracións non podemos esquecer”, afirmou o Deputado, quen tamén puxo o foco na importancia das vías de comunicación, a conexión a internet ou a creación de emprego.
O “Encontro de Sober” representa un paso importante cara ao desenvolvemento sustentable do rural galego, evidenciando o compromiso das autoridades e da sociedade en xeral coa búsqueda de solucións innovadoras e colaborativas para os retos que enfronta esta importante parte do noso tecido social e económico.•
Cargando ...
