Pantón celebrou ao grande a súa Mostra de Viños da Ribeira Sacra

Os días 11 e 12 de maio foron testemuña dun dos eventos máis agardados en Pantón: a XXIX edición da Mostra de Viños da Ribeira Sacra. O Concello de Pantón viviu un fin de semana de celebración e convivencia nun ambiente festivo e cultural, onde os viños da comarca foron os grandes protagonistas.
O evento, declarado Festa de Interese Turístico de Galicia, reuniu a veciños e visitantes nunha feira que se converteu nun referente gastronómico e cultural da zona. A apertura das casetas das 10 adegas participantes marcou o inicio dunha festa onde se puido degustar o mellor viño da Ribeira Sacra e desfrutar da riqueza vitivinícola da comarca.

FESTA DA EMPANADA
Os visitantes poideron degustar o viño acompañado de diferentes produtos da terra e desfrutar da sétima edición da Festa da Empanada.
Tamén se entregaron os premios do IX Concurso Fotográfico Rede Ribeira Sacra – Viticultura Heroica e houbo actuacións musicais con orquestras e charangas durante toda a fin de semana. As actividades xa deron comezo o xoves – 9 de maio – cunha cata de viños das tres ribeiras de Pantón.
Este ano coincidindo coa primeira xornada da mostra o recinto feiral acolleu o Brinde do Viño, que se celebrou simultaneamente en distintos territorios vitivinícolas de España para reivindicar o valor dos viños con denominación de orixe (DO). A DO Ribeira Sacra participa con 35 Consellos Reguladores máis.
A inauguración oficial a cargo de Antonio Acevedo Prado, Director Xeral de Maiores e Atención Sociosanitaria, deu comezo á programación oficial do sábado, seguida dun brinde simultáneo co Día Movemento Viño D.O. e a VII Festa da Empanada. A música en directo, da man da Orquestras Gran Parada, amenizou a festa ata altas horas da noite, creando un ambiente festivo e alegre.

E tamén foi moita presenza de medios de comunicación que cubriron o evento. Os nosos colegas de Radio Monforte. Fotos: Mar López Sotelo

PREGÓN A CARGO DE ALEXANDRA SEARA
O domingo, os asistentes puideron desfrutar do pregón da Mostra, a cargo de Alexandra Seara Sobrino, Xerente do Consorcio de Turismo da Ribeira Sacra, seguido de música en directo e actuacións culturais. O evento ofreceu diversión para todas as idades e consolidouse como unha festa na que a tradición, a gastronomía e o viño se fusionaron nun ambiente de alegría e convivencia.
A Mostra contou coa presenza, da conselleira do Medio Rural, María José Gómez, nunha visita, na que a conselleira quixo poñer en valor este tipo de mostras como escaparate da calidade da despensa galega e máis concretamente dos viños desta denominación de orixe. Gómez reafirmou, ademais, o decidido apoio da Xunta a este tipo de certames e, en xeral, a todo o que ten que ver co fomento e promoción das producións alimentarias galegas de calidade diferenciada. •