Forma parte dun novo proxecto sobre dinamización rural para fomentar a inclusión activa ao obxecto de promover a igualdade de oportunidades, a non discriminación e mellorar a empregabilidade, en particular para os grupos máis desfavorecidos
O Auditorio Municipal de Chantada acolle o 13 de maio, de 17 a 19 horas, unha importante xuntanza organizada por Acción contra a Fame en colaboración co Concello de Chantada. O obxectivo deste encontro é centrarse no ámbito do turismo e abrir un diálogo construtivo sobre o futuro deste sector na nosa contorna. Esta iniciativa enmárcase no proxecto Comunidades de Emprego e Emprendemento Rural Sostible, financiado polo Fondo Social Europeo Plus e Fundación MAPFRE. Pretende ser o punto de partida dun percorrido destinado a que entidades, empresas e cidadanía xeral poidan dialogar, descubrir potenciais, analizar sinerxias e colaborar para construír un futuro sostible e consciente en consonancia co desenvolvemento rural.
Acción contra a Fame fai un chamamento a todas aquelas persoas profesionais do sector turístico e a todas as interesadas en explorar novas oportunidades neste eido. Están especialmente convidados estudantes, asociacións, persoas desempregadas, emprendedoras, empresas do sector primario ou de servizos, entre outros. O evento conta con representación do Concello de Chantada e do Consorcio de Turismo Ribeira Sacra e abordaranse temas como financiación, desestacionalización, profesionalización, emprego, actividades complementarias e moitos máis. Con esta abordaxe participativa, buscamos identificar ideas e obxectivos que permitan dar continuidade a estas xuntanzas, sempre coa finalidade de crear e mellorar oportunidades laborais e dinamizar o noso territorio rural. Para máis información ou para confirmar a asistencia, pódese contactar chamando ao teléfono 648 16 68 48 ou enviando un correo electrónico a arandolfe@accioncontraelhambre.org.
Dentro deste mesmo proxecto dinamizador promovido por Acción contra a Fame, o Auditorio do Concello do Saviñao en Escairón foi o escenario da primeira reunión da Comunidade Rural Montes de Saberes, no marco do proxecto Comunidades Rurais financiado polo Fondo Social Europeo Plus e a Fundación MAPFRE. Destacaron os poñentes, representantes de diferentes áreas relacionadas co rural, quen expuxeron as potencialidades das comunidades de montes para xerar emprego e profesionalizar o rural. Na xornada, os asistentes abordaron as limitacións e retos que enfrontan as Comunidades de Montes tanto de forma legal, territorial, poboacional coma de recursos. Todos eles destacaron as oportunidades que teñen as Comunidades de Montes, subliñando o papel fundamental do desenvolvemento e implementación de actividades produtivas nos montes para favorecer a fixación poboacional e xerar postos de traballo. O obxectivo principal do encontro foi identificar aquelas Comunidades interesadas en xestionar os seus recursos, utilizando ao programa de Comunidades de Emprego e Emprendemento Rural Sostible como vehículo de acompañamento para a súa execución e desenvolvemento.•
