A Xunta de Galicia abriu o pasado 21 de maio, o prazo para solicitar as axudas destinadas á compra de libros de texto e material escolar, así como para participar no Fondo solidario de cara ao curso 2024/25. Estas medidas, que serán publicadas mañá no Diario Oficial de Galicia, consolidan as melloras introducidas nos últimos anos para paliar a suba de prezos e apoiar ás familias galegas.
Para o curso actual 2023/24, máis de 96.500 alumnos recibiron libros de balde e máis de 128.000 accederon aos vales de material escolar. Ademais, sumando os estudantes que utilizan libros dixitais de forma gratuíta, máis do 70% do alumnado galego conta con algún tipo de apoio da Xunta para afrontar o inicio do curso escolar. O prazo para presentar as solicitudes estará aberto ata o 21 de xuño. Os trámites realizaranse preferiblemente por vía electrónica a través do formulario dispoñible na sede electrónica da Xunta de Galicia. Opcionalmente, tamén se poderán presentar presencialmente nos centros docentes ou en calquera dos lugares e rexistros establecidos pola normativa.
Ata 75€ para material escolar
O vale para a adquisición de material escolar está dirixido a familias con renda per cápita igual ou inferior a 10.000€, divididas en dous tramos. As familias con rendas iguais ou inferiores a 6.000€ recibirán un vale de 75€, mantido desde o curso 2022/23 para facer fronte á inflación. As familias con rendas entre 6.000€ e 10.000€ recibirán un vale de 60€ por alumno. Os estudantes en situación de garda ou tutela da Xunta, os de Educación Especial ou cunha discapacidade igual ou superior ao 65% recibirán o vale de 75€, independentemente da renda.
A convocatoria tamén inclúe axudas para a compra de libros nos cursos nos que non son reutilizables, como os dous primeiros cursos de Primaria, Educación Especial e para aqueles alumnos con necesidades específicas de apoio educativo. Para 1º e 2º de Primaria, a axuda é de 240€ para familias con rendas iguais ou inferiores a 6.000€, e de 160€ para as que teñen rendas entre 6.000€ e 10.000€. Os estudantes de Educación Especial ou con discapacidade igual ou superior ao 65% recibirán 300€, independentemente da renda familiar.
No caso de alumnos con necesidades específicas que non poidan utilizar os libros do Fondo solidario, existen axudas para todos os cursos de Primaria e ESO. En Primaria, as familias do primeiro tramo de renda recibirán 240€ por fillo e as do segundo tramo 160€. En ESO, os importes serán de 270€ e 180€, respectivamente.
FONDO SOLIDARIO
O Fondo solidario para o curso 2024/25 contará con máis de 400.000 libros de texto para repartir en réxime de préstamo entre os alumnos de 3º de Primaria a 4º de ESO, excepto para os estudantes de Educación Especial e aqueles con necesidades específicas. A asignación de libros realizarase en orde inversa á renda per cápita familiar, tendo preferencia os alumnos en garda ou tutela da Xunta ou con discapacidade igual ou superior ao 65%, independentemente da renda.
Os estudantes de familias con renda per cápita igual ou inferior a 6.000€, ou que estean en situación de garda ou tutela da Xunta ou cunha discapacidade igual ou superior ao 65%, terán garantido o acceso a seis libros. As familias con rendas entre 6.000€ e 10.000€ terán acceso a catro libros. Para acceder ao Fondo solidario ou recibir as axudas, é requisito devolver os libros do curso anterior.•
Cargando ...
