Novo programa para a contratación de menores de 30 anos en Galicia

O Diario Oficial de Galicia (DOG) vén de publicar un novo programa denominado «1ª experiencia profesional», co que se incentivará a contratación de menores de 30 anos por parte de empresas, autónomos, sociedades civís e comunidades de bens. Con esta iniciativa, que conta cun orzamento global de preto de 4,2 millóns de euros, prevese a incorporación de entre 250 e 410 persoas mozas en toda a Comunidade. O programa ofrece axudas de ata 20.000 euros por persoa contratada mediante contratos formativos de doce meses de duración, co obxectivo de mellorar a súa empregabilidade e dotar á mocidade de competencias para acceder a empregos estables e de calidade. Este programa é unha das medidas anunciadas polo presidente Alfonso Rueda para os primeiros 100 días da lexislatura. A Consellería de Emprego, Comercio e Emigración busca, a través desta nova orde, mellorar a empregabilidade da mocidade galega, un colectivo prioritario nas súas políticas, e reter o talento xuvenil na Comunidade.
A iniciativa caracterízase por ser un programa mixto que combina apoios económicos para a contratación a tempo completo e formación en competencias brandas, habilidades sociais e de comunicación, actitudes, e intelixencia social e emocional, moi demandadas no mercado laboral actual. Para atender as necesidades de emprego dos menores de 30 anos, articúlanse dúas liñas de axuda: unha dirixida á contratación de mozos e mozas con titulación ou certificación profesional, e outra para aqueles sen cualificación profesional recoñecida. En ambos casos, os contratos deben dirixirse a menores de 30 anos residentes en Galicia, en situación de desemprego e inscritos no Servizo Público de Emprego. A través deste programa, ofrécese un período de práctica profesional acompañado dun proceso de formación que facilitará a inserción laboral dos participantes, xa que ao finalizar contarán coas competencias necesarias para acceder a un emprego estable.
As axudas cobren os custos salariais dos postos de traballo, con contías que oscilan entre os 9.975 euros e os 16.625 euros, dependendo dos criterios establecidos. A estas cantidades súmanse os fondos destinados á formación en competencias brandas: 1.700 euros para formación presencial e 850 euros para teleformación.
As empresas interesadas en optar a estas axudas teñen de prazo para presentar as súas solicitudes desde mañá ata o 30 de setembro de 2024, ou ata que se esgote o crédito dispoñible.
Este novo programa insírese dentro dun conxunto de medidas da Xunta para fomentar o emprego xuvenil, unha aposta firme por políticas deseñadas especificamente para este sector. Outras iniciativas destacadas inclúen o programa «Investigo», destinado a xerar emprego xuvenil no eido da investigación, cun orzamento de 4,8 millóns de euros este ano.•

Deixa unha resposta

Your email address will not be published.

Nova Anterior

Aberto o prazo de solicitudes para axudas de libros de texto e material escolar

Seguinte Nova

Besteiro reivindica ao PSdeG como defensor dos galegos en Europa

Últimas noticias sobre AXUDAS

A %d blogueros les gusta esto: