O Xeoparque Montañas do Courel acolle o IV Encontro dos Xeopícaros

O Paseo Fluvial do río Quiroga foi o escenario onde alumnos e profesores dos colexios de Quiroga e Ribas de Sil se deron cita. Baixo o lema «A auga é vida». Fotos GPCQ.

O Xeoparque Montañas do Courel viviu esta pasada semana unha emocionante xornada co IV Encontro dos Xeopícaros, enmarcado nas actividades da semana dos xeoparques. O Paseo Fluvial do río Quiroga foi o escenario perfecto onde alumnos e profesores dos colexios de Quiroga e Ribas de Sil se deron cita. Baixo o lema «A auga é vida», os máis pequenos participaron de diversos talleres sobre rochas, sedimentos, dentes animais e pegadas, guiados por expertos e técnicos do xeoparque. Unha experiencia enriquecedora que combinou aprendizaxe e diversión nun entorno natural privilexiado.
O obxectivo deste encontro era profundar no coñecemento da riqueza xeolóxica da zona, ao tempo que se fomentaba a conciencia ecolóxica entre os máis novos.
Os instrutores, incluíndo os xeólogos Daniel Ballesteros e Jose Carlos Barrios, membros do comité científico do xeoparque, así como representantes da Universidade de Santiago e empresas de interpretación do medio ambiente, lideraron os talleres cun enfoque pedagóxico e lúdico.
Ao longo da mañá, os xeopícaros tiveron a oportunidade de explorar as rochas e sedimentos do río Quiroga, observando as súas características físicas e texturas. Equipados con lupas, descubriron microorganismos e indicadores de calidade da auga, reforzando a súa comprensión sobre a importancia da preservación dos recursos naturais. Ademais, mediante actividades prácticas, aprenderon a identificar os distintos tipos de dentes animais e as súas adaptacións ao medio. Este encontro non só serviu como experiencia educativa, senón tamén como un momento de convivencia entre os alumnos dos diferentes colexios do xeoparque.
A Fundación Montañas do Courel, en colaboración coas autoridades locais e institucións educativas, continúa traballando para promover a educación ambiental e o valor do patrimonio natural da zona.•

Deixa unha resposta

Your email address will not be published.

Nova Anterior

Melloras para a Casa da Música de Chantada

Seguinte Nova

Todo listo para a XX Festa da Cereixa, do Viño e do Aceite de Ribas de Sil

Últimas noticias sobre EVENTOS

A %d blogueros les gusta esto: