O Alcalde de Monforte, José Tomé Roca, anunciou hoxe unha nova sentenza favorable para o Concello en relación coa denominada Zona C, que comprende os terreos situados entre a rúa Rof Codina e o barrio de Cobas. “É a quinta sentenza que falla a favor do Concello en relación coa Zona C e que confirma que sempre actuamos de acordo coa legalidade”, destacou o Alcalde.
A sentenza, ditada polo Xulgado do Contencioso Administrativo nº 2 de Lugo (nº 111/2024), resolve o recurso contencioso-administrativo interposto por Construcciones y Contratas Sánchez SL contra a resolución da Xunta de Goberno do Concello de Monforte de Lemos.
Esta resolución desestimaba o recurso de reposición sobre o proxecto de reparcelación da Zona C, implicando un cambio no sistema de actuación urbanística.
ANTECEDENTES DO CASO
Construcciones y Contratas Sánchez SL interpuxo unha demanda contra a decisión da Xunta de Goberno do 16 de xuño de 2021, que desestimou o recurso de reposición contra o acordo de modificación do sistema de actuación de compensación a cooperación.
A empresa alegaba que o cambio de sistema e a delimitación dos polígonos supoñían unha alteración do plan vixente sen seguir o procedemento adecuado e sen os informes necesarios.
Pola súa parte, o Concello argumentou que a modificación do sistema de actuación foi aprobada en 2005, publicada en 2020, e é firme.
Ademais, defendeu que non se require un estudo económico-financeiro nin informes sectoriais nesta fase de execución urbanística.
FUNDAMENTOS DA SENTENZA
A sentenza aclara que a modificación do sistema de actuación pertence á fase de xestión e execución, non ao plan en si. Aínda que a publicación foi tardía, o acto é válido dende a súa publicación en 2020. Respecto ao proxecto de reparcelación, a sentenza establece que está adecuadamente xustificado e non prescindiu dos polígonos existentes. A adxudicación de parcelas axústase, polo tanto, á normativa vixente, concluíndo que o Concello actuou conforme á lei. As novas alegacións presentadas no escrito de conclusións foron rexeitadas polo Xulgado por constituír desviación procesual.
FALLO
O Xulgado do Contencioso Administrativo nº 2 de Lugo desestimou a demanda de Construcciones y Contratas Sánchez SL, confirmando a legalidade da resolución impugnada. Ademais, impuxéronse as costas do proceso ao recorrente, con un límite de 500 euros. Cabe recurso de apelación no prazo de quince días ante a sala do TSXG. Esta é a quinta vez que a Xustiza confirma a legalidade das actuacións do Concello en relación co proxecto da Zona C. En 2022, tamén deu a razón á entidade municipal en relación con dous recursos interpostos pola mesma empresa, así como outra demanda presentada pola familia Conde en 2023.
José Tomé expresou a súa satisfacción por esta nova resolución, que volve dar a razón ao Concello no que respecta á Zona C, inaugurada o pasado 15 de novembro de 2022, transformando a fisionomía desta área da cidade.
ZONA C
O terreo denominado “Zona C” foi cualificado como solo urbano non consolidado no Pleno do Concello de Monforte celebrado o 12 de abril do ano 2000, publicado no BOP e no DOG o 26 e 27 de abril dese mesmo ano. Esta cualificación permitiu urbanizar a área e poñela ao servizo da cidade de Monforte.
O primeiro paso foi o Proxecto de Reparcelación da “Zona C”, desenvolvido por MONSA Urbanismo e aprobado inicialmente na Xunta de Goberno do Concello o 23 de novembro de 2020. A notificación aos donos das parcelas afectadas comezou o 9 de decembro de 2020, seguida dunha exposición pública de un mes. A aprobación do proxecto definitivo, xunto coa resolución das alegacións, tivo lugar na Xunta de Goberno do Concello o 16 de xuño de 2021. Tras estes trámites, procedeuse a elaborar o proxecto construtivo, presentado polo Alcalde xunto co anuncio da licitación das obras, que foron adxudicadas a Misturas Obras e Proxectos S.A. por un importe de 915.225,85 euros (IVE incluído). As obras de urbanización da Zona C comezaron o 18 de xaneiro e culminaron coa inauguración da área o 15 de novembro de 2022.
O PP esixe transparencia a Tomé nas sentenzas xudiciais que afectan ao Concello de Monforte
A voceira do Partido Popular en Monforte, Katy Varela, reclama ao alcalde José Tomé “total transparencia” nas comunicacións das sentenzas xudiciais que afectan ao Concello de Monforte. Varela critica que Tomé só fai públicas aquelas resolucións favorables ao Concello, gardando silencio sobre as que son en contra dos seus intereses. Katy Varela reprocha que o alcalde informase publicamente dunha sentenza favorable ao Concello, identificando con detalle aos veciños implicados no litixio. “Non fai o mesmo cando as resolucións son en contra dos seus intereses; nese caso sempre garda silencio”, declarou Varela.
Os populares consideran que o alcalde debería informar de todas as sentenzas, tanto as favorables como as desfavorables, xa que afectan a toda a cidadanía de Monforte. Neste sentido, Varela sinala que hai quince días solicitaron información sobre todas as sentenzas e autos xudiciais nos que o Concello sexa parte e aínda non recibiron resposta. Varela puxo como exemplo de falta de transparencia unha sentenza ditada o 13 de maio polo Xulgado de Primeira Instancia do Contencioso-Administrativo de Lugo que anulou o decreto de alcaldía 2022/857, de 1 de xuño de 2022, sobre a resolución do contrato de adxudicación de parcelas de solo industrial no polígono do Reboredo. Segundo Varela, Tomé tentou ocultar esta resolución.
A voceira popular argumenta que a transparencia debe ser unha constante na xestión municipal. “Vemos como a transparencia só aparece cando lle interesa ao alcalde”, denuncia Varela. Ademais, sinala que Tomé debería centrar os seus esforzos en xestionar as necesidades de todos os cidadáns en lugar de enfrontarse a aqueles que non están de acordo con el.
Os populares insisten na importancia de manter unha liña de actuación consistente e transparente por parte do goberno municipal, especialmente en asuntos que teñen un impacto directo sobre a comunidade.
As críticas do PP veñen despois de que o alcalde José Tomé destacase unha sentenza favorable ao Concello nun litixio relacionado coa Zona C, unha área situada entre a rúa Rof Codina e o barrio de Cobas. Tomé subliñou que esta era a quinta sentenza favorable ao Concello respecto desta zona, reafirmando a legalidade das actuacións municipais. Con todo, os populares acusan ao alcalde de non ser transparente noutras resolucións xudiciais menos favorables.
A sentenza de maio que anulou o decreto sobre as parcelas industriais no polígono do Reboredo é un exemplo disto.
A esixencia de transparencia total por parte do Partido Popular busca garantir que a cidadanía de Monforte teña acceso a toda a información relevante sobre a xestión municipal.•
