O Alcalde de Monforte, José Tomé Roca, anunciou esta semana pasada en rolda de prensa a construción dun novo aparcadoiro no Polígono industrial de O Reboredo. Este proxecto engádese ao conxunto de medidas de impulso, consolidación e crecemento que o seu goberno vén desenvolvendo desde 2015 para garantir que o polígono goce de «moi boa saúde».
A actuación proxectada polo Executivo de José Tomé consistirá na construción dun novo aparcadoiro con capacidade para 17 camións e 64 turismos, incluíndo 2 prazas adaptadas e 4 prazas con cargadores eléctricos. O novo aparcadoiro, que se ubicará na marxe esquerda da vía principal do polígono, terá unha superficie total de 6.400 m², triplicando a capacidade do actual.
«Esta actuación é fundamental para mellorar os servizos do polígono, paliando o déficit existente e facendo aínda máis atractivo o noso polígono para a implantación de novas empresas, xerando riqueza e postos de traballo», explicou o Alcalde.
Detalles do novo aparcadoiro
O novo aparcadoiro contará cun pavimento de aglomerado asfáltico na calzada e formigón semipulido na beirarrúa perimetral. As prazas para turismos terán unhas dimensións de 5×2,50 metros, mentres que as de camións serán de 17×3,50 metros. Ademais, contará cunha serie de dotacións adicionais para mellorar a súa funcionalidade e comodidade:
- Zonas verdes e árbores: que proporcionarán sombra ás prazas de aparcamento.
- Fontes de auga potable: instalaranse tres fontes en diferentes puntos do aparcadoiro.
- Contedores de residuos sólidos urbanos: haberá dúas zonas destinadas a contedores.
S- istema de drenaxe: para recoller a auga da choiva e evitar acumulacións. - Iluminación pública: con luminarias LED sobre columnas metálicas de 12 metros.
- Cargadores eléctricos: para alimentar as prazas de aparcamento con cargadores.
- Telecomunicacións: rede de servizo ás seis cámaras de videovixilancia.
- Abastecemento: para dar servizo ás fontes instaladas.
EXECUCIÓN DE PROXECTO E ORZAMENTO
O proxecto, que se aprobará o 17 de xuño en Xunta de Goberno, conta cun orzamento de 305.250,57 euros, dos cales 120.000 euros proceden dunha subvención da Consellería de Economía e Industria. O Concello cubrirá o resto do custo, aportando 185.250,57 euros.
Unha vez aprobado o proxecto, sairá a licitación o 18 de xuño e as ofertas poderán presentarse ata o 15 de xullo. O proceso de apertura de sobres terá lugar o 17 e 24 de xullo, e a execución das obras está prevista para comezar despois da sinatura da acta de replanteo, cun prazo estimado de dous meses.
UN POLÍGONO EN CONSTANTE MELLORA
Dende que José Tomé asumiu a Alcaldía en 2015, o Polígono do Reboredo experimentou unha transformación significativa grazas aos investimentos realizados en infraestruturas e servizos. O Alcalde destacou que «o polígono é unha prioridade para o noso goberno, cunha localización estratéxica a 1,5 km da N-120 e da futura autovía A-76, facéndoo atractivo para empresas de fóra do noso ámbito territorial».
Entre 2016 e 2022, investíronse máis de 1,1 millóns de euros en melloras como o pavimento, alumeado, saneamento e comunicacións, así como na reforma da EDAR. Outros proxectos destacados inclúen a construción dunha nova vía de comunicación e a creación do primeiro Viveiro de Empresas industrial na zona.
No futuro, prevese a construción dunha nova depuradora, cun investimento de 4,6 millóns de euros, e a ampliación do polígono, que duplicará a súa superficie, sumando 275.000 metros cadrados adicionais e converténdose nun dos máis grandes do interior de Galicia.
PROXECCIÓN DE FUTURO
O Polígono do Reboredo segue atraendo o interese de novas empresas, grazas á promoción continua do Concello. Entre os novos proxectos destaca a implantación da farmacéutica KernPharma, cun investimento de máis de 60 millóns de euros e a creación de máis de 100 empregos, así como a ampliación das instalacións da empresa láctea Oviganic Ibérica.
Cargando ...
