Terá lugar do 5 ó 7 de xullo no Paseo do Malecón e contará coa participación de 34 adegas, que supoñen o número máis alto de participación nas 6 edicións que se levan celebrado do certame
O Alcalde de Monforte, José Tomé Roca, xunto coa 1ª Tenente de Alcalde, Gloria Prada, desvelou os detalles do esperado Festival do Viño da Ribeira Sacra de Monforte, que celebrará a súa sexta edición do 5 ao 7 de xullo no paseo do Malecón da cidade.
«O Festival do Viño da Ribeira Sacra de Monforte é unha proposta diferente cun amplo programa de actividades que xiran en torno ao viño, o auténtico protagonista do festival», sinalou José Tomé. Destacou o incremento no número de adegas participantes, que alcanza un récord de 34 este ano, o máis alto dende a súa primeira edición en 2017.
«Todas estas adegas ofrecerán ó visitante a posibilidade de degustar e gozar dunha ampla variedade de viños que non deixarán indiferente a ninguén, nunha contorna natural, tranquila e confortable á beira do Río Cabe, no Paseo do Malecón», engadiu o Alcalde.
José Tomé tamén enfatizou a importancia deste evento como unha referencia non só na provincia de Lugo, senón tamén en toda Galicia e máis alá das súas fronteiras. «Estou convencido de que o Festival do Viño da Ribeira Sacra de Monforte continuará a ser un evento de referencia, non só no sur da provincia de Lugo, senón tamén en toda Galicia, e máis alá das nosas fronteiras, de feito, está en todo o mundo», afirmou.
En canto ao cartel oficial do festival, o Alcalde indicou que este ano se quixo destacar o papel crecente das mulleres no mundo do viño. «Quixemos que a figura feminina fose protagonista do cartel, non só porque as mulleres están cada vez máis implicadas no mundo do viño, senón tamén porque queremos animar a que proben tamén os viños tintos», explicou José Tomé Roca.
O programa inclúe unha ampla variedade de actividades, dende talleres de cata de viños da D.O. Ribeira Sacra ata masterclass impartidas por expertos enólogos. Como é habitual, haberá música en vivo, con destacadas actuacións como a da Real Banda de Gaitas da Deputación de Ourense, Gin Toni’s e Malenne.
Os asistentes tamén poderán gozar dunha zona gastronómica con produtos locais e participar nas actividades infantís.
Ademais, ofertaranse viñorutas polo Sil e o Miño, ofrecendo unha experiencia única para os amantes do viño e a cultura galega.
Con estas expectativas, a sexta edición do Festival do Viño da Ribeira Sacra de Monforte promete ser unha cita ineludible para os amantes do viño e os curiosos que desexen descubrir os segredos da Ribeira Sacra.•
Cargando ...
