A Deputación de Lugo volve reclamar á Xunta de Galicia que acelere o proceso de contratación necesario para avanzar nas obras de desdobramento do corredor entre Lugo e Monforte de Lemos. Esta demanda foi acordada por unanimidade no Pleno ordinario celebrado este martes no Pazo de San Marcos, onde a moción presentada polos socialistas contou co apoio do PSdeG, BNG e PP.
O Presidente da Deputación, José Tomé Roca, subliñou a importancia desta iniciativa, destacando que “o PP e a Xunta de Galicia deben cumprir co compromiso adquirido. No Parlamento de Galicia houbo unha votación unánime para o desdobramento desde Nadela ata Monforte. Aínda que as prioridades son de Sarria a Lugo, é necesario comezar xa cos proxectos e estudos pertinentes para continuar o desdobramento ata Monforte, garantindo así a conexión con Lugo e a A-76”.
Pablo Rivera Capón, Deputado de Promoción Económica e Social, reforzou a necesidade desta infraestrutura, indicando que “estamos ante unha oportunidade histórica de vertebrar a provincia, conectando o centro co sur do noso territorio.
A Ribeira Sacra, unha comarca moi poboada e turisticamente atractiva, ten que ter unhas boas comunicacións que agora non temos”.
Rivera Capón lembrou que hai tres meses, a Deputación xa urxira á Xunta a redacción dun proxecto global para executar o desdobramento dos 54 quilómetros pendentes do corredor. Referíndose a un acto recente en Páramo, ao que asistiu Alfonso Rueda, o Deputado criticou que a Xunta tratase de “renomear as cousas para disimular o incumprimento coa capital da Ribeira Sacra”, ao anunciar a ampliación dun treito de 13,5 km que beneficiará a preto de 100.000 usuarios sen incluír aos transportistas.
Esta infraestrutura, explicou Rivera Capón, ten un alto volume de tráfico e a conversión do trazado en autovía responde a unha demanda social avalada por varios acordos unánimes no Parlamento de Galicia.•
Cargando ...
