O Alcalde de Monforte, José Tomé Roca, deu a coñecer o cartel gañador das Festas Patronais. O deseño elixido, obra de Rubén Lucas García, foi presentado baixo o pseudónimo de «Mulleres» e destaca pola súa homenaxe á figura feminina. Na presentación, o Alcalde estivo acompañado pola 1ª Tenente de Alcalde, Gloria Prada.
José Tomé resaltou a participación de 20 traballos, un aumento significativo fronte aos 15 da pasada edición, demostrando o crecemento do interese polo concurso. «Cando convocamos o concurso de carteis para as Patronais, facémolo permitindo a participación de calquera persoa interesada en divulgar as nosas festas a través da súa capacidade artística», comentou o Alcalde. Desde 2015, o concurso mantense aberto ao público xeral, permitindo unha maior variedade de ideas e propostas.
O xurado, composto por sete representantes dos ámbitos sociais, educativos e culturais de Monforte, escolleu o deseño gañador tras cinco rondas de clasificación. Este ano, a Tenente de Alcalde, Gloria Prada, participou no xurado en lugar da Concelleira de Cultura, Marina Doutón, que non puido asistir por estar de baixa.
O cartel «Mulleres» presenta unha muller gaiteira, cuxo corpo integra elementos icónicos das festas, como a Ponte Vella, o río, os Escolapios e a Praza de España, así como figuras femininas relevantes como a Virxe de Montserrat e as gaiteiras. «O cartel aúna na figura feminina da gaiteira a tradición da festa cos elementos icónicos da nosa cidade, e resalta as figuras femininas protagonistas dos nosos festexos», salientou José Tomé.
Todos os traballos presentados estarán expostos na Casa da Cultura de Monforte a principios de agosto, e os autores non premiados poderán recoller as súas obras ao finalizar a exposición.•
