Monforte segue a destacar pola súa exemplar xestión dos residuos. O alcalde José Tomé Roca recolleu en Madrid o premio Vasoira de Platino 2024, outorgado pola Asociación Técnica para la Gestión de Residuos, Aseo Urbano y Medio Ambiente na Feira Internacional de Urbanismo e Medio Ambiente, celebrada en IFEMA.
A cidade foi recoñecida por apoiar e difundir as boas prácticas na xestión dos residuos e limpeza urbana, así como polo desenvolvemento de proxectos e tecnoloxías para unha xestión sostible. O alcalde destacou que “este galardón culmina o traballo ben feito desde que en 2023 iniciamos a recollida de lixo orgánico, sendo un dos primeiros concellos da provincia de Lugo en facelo”.
ATEGRUS destacou o plan de xestión de materia orgánica de Monforte, adaptado ás necesidades dos cidadáns: no ámbito urbano mediante o sistema de cubeo porta a porta, no periurbano a través de contedores con chave, e na zona rural con composteiros individuais.
José Tomé salientou os excepcionais datos de recollida de materia orgánica, con 25.000 quilos mensuais, o que representa 1.000 quilos diarios. “Somos a cidade que máis recolle, igualando o volume de Lugo e Ourense xuntas”, afirmou, agradecendo aos veciños a súa colaboración.
O alcalde tamén subliñou que a recollida aínda non inclúe a hostalería, que se sumará ao plan en setembro. O Plan Municipal de Xestión dos Residuos de Orixe Orgánica, inclúe accións tanto na zona urbana como rural.•
