A Sociedade Galega de Medio Ambiente está a considerar a actualización do canon aplicado aos concellos para a xestión e tratamento dos seus residuos, en resposta ás recentes decisións do Goberno central que impactaron significativamente no custo do servizo. A Xunta transferirá 9 millóns de euros ás 295 entidades locais adheridas ao modelo Sogama este ano para minimizar o impacto desta medida.
O Consello de Administración de Sogama reuniuse hoxe para analizar a situación e avaliar a proposta de revisión do canon para o ano 2024. Informouse que o novo imposto estatal á vertedura e á incineración, en vigor desde xaneiro de 2023 e contra o que a Xunta xa presentara alegacións, supuxo un desembolso de 14,4 millóns de euros para Sogama ata o momento. Ademais, a empresa tivo que abonar 2,9 millóns de euros pola recuperación do imposto estatal do valor da enerxía eléctrica.
A estas contías engádese a eliminación, en xullo de 2023, da retribución que Sogama viña percibindo polo investimento realizado na súa planta termoeléctrica, unha instalación de última xeración que emprega tecnoloxía eficiente e sustentable no seu proceso de combustión.
Como resultado, o encarecemento do servizo en 2023 cifrouse nun total de 21,9 millóns de euros, asumidos integramente por Sogama. Propúxose hoxe que o importe medio a pagar este ano polos 295 concellos que envían os seus residuos a Cerceda quede fixado en 66 euros por tonelada, descontada xa a achega da Xunta ás entidades locais a través dun Fondo de cooperación adicional, que sería de 12 euros por tonelada.
A Federación Galega de Municipios e Provincias terá agora 10 días hábiles para presentar posibles alegacións á proposta. Unha vez transcorrido ese prazo, o Consello de Administración de Sogama volverá reunirse para facer a súa proposta á Consellería de Medio Ambiente e Cambio Climático que, previo informe do departamento de Facenda e Administración Pública, aprobará o novo canon deste ano.
Mesmo despois de aplicada a actualización proposta, o canon de Sogama seguirá sendo o máis barato de España en comparación co resto de plantas de tratamento de residuos municipais da súa mesma tipoloxía.
Ademais, a través do novo Plan de Xestión de Residuos Municipais de Galicia, que se atopa na recta final da súa tramitación, a Xunta seguirá a articular accións e campañas orientadas a promover a prevención e redución de residuos na orixe, así como a impulsar unha correcta selección dos mesmos, incluída a materia orgánica. As cifras de reciclaxe seguirán crecendo en detrimento da cantidade depositada no contedor xenérico, o que reducirá o importe que os entes locais terán que pagar a Sogama pola xestión e tratamento dos residuos procedentes da chamada bolsa negra.
A Xunta e Sogama reiteran a súa vocación de levar a cabo unha xestión de residuos máis eficiente e sustentable, reducindo custos para as entidades locais e fomentando unha maior responsabilidade ambiental entre a cidadanía galega.•
Cargando ...
