O Concello de Chantada vén de anunciar a programación das súas Festas Patronais en honra á Virxe do Carme, que se desenvolverán entre o 22 e o 27 de agosto. Estas festas, coñecidas pola súa ampla variedade de actividades e actuacións musicais, prometen este ano unha edición chea de novidades e diversión para todos os públicos.
Os concertos nocturnos arrancarán o 22 de agosto coa actuación de Los Fabulosos Weekend. Este singular conxunto músico-vocal, composto por recoñecidos artistas galegos como Chema Ríos, Alfonso Espiño, Gonzalo Sende e o popular actor e cantante Manuel Manquiña, ofrecerá un enérxico directo con versións de temas de rock clásico e outros temas propios.
O 23 de agosto será a quenda do Festival de DJ’s, que se celebrará na Praza do Pavillón e contará con artistas como Dumore, Carlos López e Marcos Magán. «Levamos varios anos organizando este Festival e dámoslle continuidade porque funciona moi ben», destaca o concelleiro de Cultura, Manuel Diéguez.
O día 24 de agosto terá lugar o tradicional Folión de Carros, unha Festa de Interese Turístico Galego e Ben de Interese Cultural desde 2018. A Asociación Amigos do Folión, en colaboración co Concello organiza este evento único. «O Folión é algo único, non hai outra actividade como esta en ningún lado e desde o Concello tentamos colaborar e coidar esta festa tradicional. Para o remate do Folión, contaremos coa orquestra Tango», explica Diéguez.
A programación musical deste ano está deseñada para satisfacer todos os gustos e públicos. Destacan as actuacións de importantes orquestras galegas como Los Satélites, Tango, Combo Dominicano e o Grupo América.
O domingo, 25 de agosto, actuarán Los Satélites, cunha longa traxectoria desde 1938 e 13 discos ás súas costas, e La Fórmula, que con 17 artistas ofrecerá un show diferente. Ese mesmo día celebrarase o XXXIII Certame de Bandas de Música na Praza do Cantón desde as 18:30h, coa participación de dúas bandas convidadas e a anfitrioa.
O luns, 26 de agosto, o Combo Dominicano e Olympus porán a música, mentres que durante o día se celebrará unha Festa Infantil e pola noite unha sesión de Fogos Artificiais.
O último día das festas, o 27 de agosto, celebrarase a tradicional Festa da Empanada, acompañada por charangas e grupos de gaitas. Os concertos estarán a cargo do Grupo América e a orquestra Cinema.
«Organizamos estas Festas tentando traer o mellor e que repercuta economicamente no Concello. Unha programación para todos os públicos na que seguimos confiando porque funciona. Polos datos que temos, as Festas están sendo bastante multitudinarias e a xente pásao ben, dinamizando tamén a restauración e a hostalaría local. Se as festas son boas, son boas para todos. Esperamos que o tempo acompañe porque a climatoloxía é importante para ter un bo balance das Festas», asegura o alcalde do Concello, Manuel Lorenzo Varela.•
