O Alcalde de Monforte de Lemos, José Tomé Roca, fixo unha primeira valoración da sexta edición do Festival do Viño da Ribeira Sacra, calificando o evento como “un éxito rotundo en todos os sentidos”. Este festival, celebrado recentemente, reafirmou a súa posición como un evento clave para a promoción do viño da Denominación de Orixe Ribeira Sacra e para a proxección de Monforte como a capital da comarca, así como dun auténtico paraíso interior de Galicia.
Consolidación dun evento de referencia
José Tomé destacou que esta edición representa a consolidación definitiva do festival, non só como unha plataforma de promoción do viño da Ribeira Sacra, senón tamén como un motor de desenvolvemento para Monforte e toda a comarca. “Como a min me gusta chamar, un pedazo de paraíso do interior de Galicia”, sinalou o alcalde, quen subliñou a importancia de promover non só o viño, senón tamén os elementos culturais e turísticos que enriquecen a experiencia do visitante.
A mellor edición ata a data
Segundo o rexedor, a edición de 2024 foi a mellor celebrada ata agora, grazas a varios factores clave. “A asistencia masiva de público, con moita xente de fóra de Monforte e incluso de fóra de Galicia, a satisfacción dos adegueiros coas vendas incrementadas exponencialmente este ano, e a satisfacción dos stands gastronómicos, que me transmitiron o seu entusiasmo polas vendas acadadas, son sinais inequívocos do éxito desta edición”, comentou Tomé.
Compromiso as adegas e colaboración institucional
O alcalde destacou o compromiso das 34 adegas participantes, resaltando a súa satisfacción coa organización do festival. “Quero agradecer expresamente ao Consello Regulador a súa colaboración e, sobre todo, á xente do mundo do viño, que contribúen masivamente a este evento nunha época de moito traballo para eles. A súa presenza no festival é un esforzo engadido que se valora enormemente”, afirmou.
Tomé tamén fixo fincapé na importancia de levar o festival máis aló das fronteiras locais e autonómicas, destacando a presenza de público de diversas partes de España e do estranxeiro. “O noso obxectivo é promover o noso viño máis aló de Galicia e do resto do Estado, algo que se evidencia co crecemento continuado da asistencia de visitantes foráneos”.
Éxito nos concertos, catas e stands de alimentación
Os concertos, realizados dentro do recinto do festival, destacaron pola súa alta calidade musical e artística, atraendo a un público numeroso que permaneceu máis tempo no entorno do Malecón, contribuíndo ao ambiente festivo. A decisión de ampliar o horario de peche, tomada por primeira vez este ano, foi ben recibida tanto polos adegueiros como polos visitantes, permitindo desfrutar do evento ata o último momento.
Outro punto destacado foron as catas de iniciación, que superaron con creces a demanda prevista. “Isto indícanos que debemos ampliar esta actividade nas próximas edicións”, engadiu o alcalde.
Esforzo rganizativo e investimento económico
José Tomé subliñou o esforzo organizativo e económico realizado polo Concello de Monforte para levar a cabo o festival, que supón unha inversión superior aos 250.000 euros. “Gústame chamarlle investimento, posto que produce un retorno económico importante, unha publicidade valiosa e un maior coñecemento do viño de Monforte e da Ribeira Sacra, que está en auxe. Isto resulta nun crecemento do turismo e doutros sectores económicos como o comercio e a hostalería, incrementándose a demanda de prazas hoteleiras e pisos turísticos, o que sen dúbida é unha boa noticia para o desenvolvemento económico da nosa comarca”.
O evento desenvolveuse con total normalidade, grazas á coordinación da Policía Local e a empresa de seguridade contratada, o que foi clave para garantir o bo desenvolvemento do festival. “Temos que felicitarnos todos pola normalidade e o éxito desta edición”, afirmou o alcalde.
Planificación para futuras edicións
Concluíndo a súa valoración, José Tomé expresou a súa determinación de seguir mellorando o festival. “A partir de hoxe mesmo, xa estamos traballando na VII edición, para continuar mellorando e crecendo na promoción do viño da Ribeira Sacra”.
Con esta sexta edición, o Festival do Viño da Ribeira Sacra consolídase como un evento de referencia, non só para os amantes do viño, senón tamén como un motor de promoción turística e económica para Monforte e a súa comarca, contribuíndo a situar esta comarca como un destino imprescindible dentro do panorama vitivinícola galego e nacional.•
Cargando ...
