O pavillón do colexio Eloísa Rivadulla acolleu o pasado domingo a I Festa Interxeracional do Concello de Chantada, cunha participación de 350 persoas. Este evento, que substitúe á antiga Festa da Terceira Idade, abre a celebración a todas as xeracións familiares. “Un éxito total, moitos maiores viñeron acompañados de fillos e netos. Para o vindeiro ano igual a plantexamos para o último sábado de xuño”, comentou o alcalde, Manuel Lorenzo Varela.
A concelleira de Servizos Sociais e Benestar, María Cándida Carnero, destacou a importancia de fixar unha data anual para a festa. “A xente estaba contenta de participar nun evento para todas as idades. Moitos pedían que se repetira cada mes. Queremos buscar unha data fixa para cada ano”.
A festa comezou ás 13:00h cunha Misa solemne, seguida dun cóctel de benvida e un xantar popular. A xornada rematou cunha sesión de baile ata as 21:00h. Durante a celebración sorteáronse fins de semana no Balneario Iberik Augas Santas e agasallos de empresas locais como Adegas Amedo, Viñedos Vía Romana e Gadis, entre outras. Todos os participantes recibiron tamén obsequios doados polo GDR Miño-Ulla.
“O éxito deste tipo de actos depende da participación de moitas persoas. Queremos agradecer a implicación do persoal do Concello e do CEIP Eloísa Rivadulla. Seguiremos con estas actividades que homenaxean ás familias e aos nosos maiores”, concluíu Manuel Lorenzo.•
