O Diario Oficial de Galicia (DOG) vén de publicar a orde da Consellería de Emprego, Comercio e Emigración que, neste 2024, busca fomentar a contratación de mulleres en ocupacións tradicionalmente masculinizadas. Esta iniciativa, que tamén promoverá a adaptación dos espazos de traballo para favorecer a igualdade, conta cun orzamento inicial de preto de 1,7 millóns de euros, ampliable segundo as necesidades.
Trátase da primeira vez que se implementa esta medida, dando cumprimento á Lei para a igualdade efectiva de mulleres e homes de Galicia, aprobada a finais do ano pasado. A orde de achegas forma parte dos compromisos para os primeiros 100 días de lexislatura do presidente Alfonso Rueda. O obxectivo principal é incrementar a presenza feminina en sectores tecnolóxicos e industriais de alto valor engadido, como a información e comunicación, así como en actividades profesionais científicas e técnicas. Tamén se pretende atraer e reter talento, reducir a fenda salarial de xénero, incrementar a renda das mulleres e promover a súa promoción profesional.
A través desta iniciativa, espérase beneficiar a unhas 75 mulleres desempregadas, que serán contratadas en sectores como a enxeñaría en construción e obra civil, enxeñarías relacionadas co deseño, investigación e desenvolvemento, análise e deseño de software, e en ocupacións técnicas nas ciencias físicas, químicas e ambientais. Outros ámbitos incluídos son a loxística, transporte de pasaxeiros e mercadorías, e a mecánica e reparación de equipamentos electrónicos, entre outros.
As entidades beneficiarias desta orde de achegas serán empregadores e empresas, independentemente da súa forma xurídica, que contraten mulleres en ocupacións masculinizadas para traballar en centros radicados en Galicia. A convocatoria conta con dúas liñas de axuda: a primeira, para fomentar a contratación indefinida de mulleres desempregadas en ocupacións con infrarrepresentación feminina, cunha contía base de 15.000 euros para contratos a tempo completo e 7.500 euros para contratos a tempo parcial ou fixos-discontinuos. Estas cantidades poderán incrementarse nun 15% en casos específicos, como centros de traballo en concellos rurais, mulleres con discapacidade, maiores de 45 anos, retornadas ou estranxeiras, ou persoas trans, podendo alcanzar ata 26.250 euros por persoa contratada.
A segunda liña de axudas está destinada a promover a adaptación dos espazos ou postos de traballo, mediante obras en aseos, vestiarios ou espazos para menores, realizadas e pagadas ata o 20 de outubro de 2024. O importe máximo da axuda será de 10.000 euros.
En total, a axuda máxima posible para unha empresa beneficiaria podería ascender a 36.250 euros por persoa contratada e pola adaptación do espazo. O prazo de solicitude das achegas estará aberto ata o 30 de setembro.
Con esta orde, Galicia amosa o seu compromiso coa igualdade de xénero no ámbito laboral, un paso máis cara a unha sociedade máis xusta e equitativa. Búscase, non só reducir a fenda de xénero, senón tamén potenciar o talento feminino en sectores clave para a economía.•
