Foto GPVDL.
A área de Rural da Vicepresidencia da Deputación de Lugo organizou un curso sobre o manexo de colmeas para combater a vespa velutina en Tuiriz, Pantón. A formación, impartida por técnicos da Casa do Mel de Goente, centrouse en métodos preventivos para protexer as colmeas desta especie invasora, combinando contidos teóricos e prácticos.
Esta iniciativa, realizada coa colaboración da Comunidade de Monte Veciñal en Man Común de Ferroedo, forma parte dun programa máis amplo de formación en apicultura impulsado pola área provincial. O obxectivo é actualizar os coñecementos dos apicultores e apicultoras e fomentar o interese por esta actividade entre a mocidade.
Desde o inicio do programa en xuño, xa se ofreceron cursos en Vilalba, O Valadouro e Xove. Nas próximas datas, celebraranse novas sesións en Muras, Cervo e Mondoñedo, abordando distintas cuestións relevantes para o desenvolvemento da apicultura.
Esta proposta nace da colaboración e diálogo coas entidades representativas do sector, complementando outras actuacións desenvolvidas recentemente coa Asociación Galega de Apicultura.
Próximos cursos
- Muras: Iniciación á apicultura: 20, 21, 27 e 28 de xullo (de 9 a 14 horas) no Local Municipal de Carelle. Cría de raíñas con abella autóctona: 3, 4, 13, 15 e 16 de agosto (de 9 a 14 horas) no Local Municipal de Carelle.
- Cervo: Formas de manexo na colmea para a loita contra a velutina: 14 e 15 de setembro (de 9 a 14 horas) no Museo do Mar de San Cibrao.
- Mondoñedo: Formas de manexo na colmea para a loita contra a velutina: 23 e 24 de setembro (de 9 a 14 horas) no IES San Rosendo.
Os interesados poden inscribirse no enderezo electrónico casadomel@vodafone.es ou chamando ao teléfono 661003616. •
Cargando ...
