A parroquia de Ferreiros acolleu a pasada fin de semana a segunda edición do festival Brindadeira.
Brindadeira xurdiu como parte dunha iniciativa do goberno municipal para recuperar a tradición do ‘brindo’, un xénero de improvisación oral cantada propio das terras da Pobra do Brollón. Organizado polo Concello en colaboración coa asociación veciñal de Ferreiros, o festival combinou charlas, regueifa, freestyle e música, nunha celebración que atraeu a numerosos veciños e visitantes.
O programa comezou o sábado ás 19:00 horas no local social de Ferreiros coa charla ‘Brindando na Guimaralia’, onde se expuxeron os resultados dos obradoiros de brindo realizados ao longo de 2023. A partir das 20:30 horas, o campo da festa de Ferreiros encheuse de vida con actuacións de brindo e regueifa a cargo do colectivo Erre que Erre, seguidas por unha sesión de freestyle liderada por Big Meu e colegas. A noite pechouse cunha animada sesión de Sincereza Dj.
A xornada dominical comezou cun paseo dende o campo da festa ata Forgas, onde na aldea dos afamados brindeiros Veloso, uns dos últimos improvisadores da zona, continuou o festival co remate dun mural colaborativo na vivenda familiar. A continuación, houbo unha homenaxe musical aos brindeiros de Forgas, acompañada dun vermú. •
Cargando ...
