O Pazo de Tor foi o escenario da presentación do catálogo da exposición «Historia do Futuro» de Pamen Pereira e Che Marchesi. Esta publicación recolle, mediante fotografías e textos, as nove obras que conforman a mostra, froito da intervención artística dos creadores nas diversas estancias do Pazo. Desde os cuartos das mulleres do servizo ata o cuarto da señora, pasando pola capela e o cuarto onde o poeta Uxío Novoneyra descansaba durante as súas visitas, a exposición ofrece novas perspectivas sobre a historia do edificio e das persoas que o habitaron. Na presentación, que contou coa presenza da deputada de Cultura, Iria Castro, e a xerente da Rede Museística, Encarna Lago, destacouse a fonda pegada que «Historia do Futuro» deixa en Tor. Castro e Lago agradeceron a dedicación e sensibilidade de Pamen Pereira e Che Marchesi, que, a través das súas obras, crean unha narrativa que nos achega á memoria silenciada dos habitantes excluídos da historia rexistrada por razóns de clase, identidade sexual, relixión ou orixe. O catálogo inclúe textos do historiador da arte e divulgador Miguel Ángel Cajigal, do poeta Karlotti Valle e do cofundador e socio da Sociedade Galega de Historia Natural e gaitero Xan Silvar. Estes textos complementan as imaxes das obras, proporcionando unha visión máis profunda e reflexiva sobre a exposición e o seu impacto.
Unha das obras máis destacadas, «Todo é ilusión», unha instalación de efectos ópticos no armario dos xoguetes do cuarto da nodriza, pasará a formar parte da exposición permanente do Pazo de Tor. Esta peza foi adquirida pola Rede Museística Provincial, que continúa ampliando os seus fondos con obras de artistas femininas contemporáneas.
Cargando ...
