O Alcalde de Monforte, José Tomé Roca, anunciou que o Equipo de Goberno aprobou na Xunta de Goberno celebrada o pasado 15 de xullo a concesión de 8.000 euros en axudas a entidades e asociacións sen ánimo de lucro que están inscritas no Rexistro Municipal de Asociacións. Estas axudas están destinadas a apoiar actuacións no ámbito dos servizos sociais e da inclusión social no Concello de Monforte durante o exercicio 2024.
En concreto, outorgóuselle un importe de 2.000 euros a cada unha das seguintes asociacións: AGORA, AFAMON, AUXILIA e ALBORES. Estas contías foron concedidas en base aos seus proxectos e de acordo coas bases establecidas para estas subvencións, que ano tras ano convoca o Alcalde, demostrando a súa sensibilidade coas necesidades destas entidades.
«Con estas axudas,» sinala o rexedor monfortino, «desde o Goberno municipal facilitamos recursos a estas entidades para a inclusión social, para garantir a autonomía persoal e para brindar oportunidades sociais e educativas. Así mesmo, axudamos a previr a aparición de dependencia, desigualdade ou desprotección a aquelas persoas máis vulnerables.»
Esta liña de axudas, que se pon en marcha ano tras ano polo Executivo de José Tomé, busca fomentar e apoiar o desenvolvemento de proxectos complementarios aos servizos sociais comunitarios. Estas entidades de iniciativa social, previamente inscritas no Rexistro Municipal de Asociacións, son seleccionadas atendendo ao seu interese social, calidade, carácter innovador e a súa articulación efectiva coa oferta pública de servizos sociais comunitarios.
ASOCIACIÓNS BENEFICIADAS
As asociacións beneficiadas desempeñan un papel fundamental no tecido social de Monforte. AGORA traballa en proxectos de inclusión e apoio a colectivos desfavorecidos, mentres que AFAMON ofrece asistencia a persoas con Alzheimer e outras demencias. AUXILIA, pola súa banda, centra os seus esforzos en mellorar a calidade de vida das persoas con discapacidade, e ALBORES dedica os seus recursos a apoiar a infancia e a mocidade en situación de risco.•
Cargando ...
