O Alcalde de Monforte, José Tomé Roca, anunciou a posta en marcha dunha nova campaña informativa para promover a correcta reciclaxe da materia orgánica. Esta iniciativa, que se desenvolverá a través de carpas informativas situadas en diferentes puntos da cidade, enmárcase dentro do “Plan de Xestión da Materia Orgánica” que o Concello puxo en marcha no 2023 co colector marrón.
Baixo o lema «RecicLemos de xeito sostible», esta campaña ten como obxectivo informar aos veciños e veciñas sobre as claves dunha axeitada reciclaxe da materia orgánica. Trátase da cuarta campaña de accións en rúa promovida polo Executivo de José Tomé desde a implementación do novo servizo de recollida en 2023.
«Dirixímonos a toda a cidadanía, especialmente a aquelas persoas que nos visitan durante o período estival e que teñen vivenda no Concello pero non viven habitualmente aquí, para que coñezan este servizo e poidan utilizalo», destacou o Alcalde.
A campaña comezará o 22 de xullo coa primeira carpa na rúa Cardeal, continuando o 29 de xullo na rúa Doutor Casares con rúa San Pedro, o 1 de agosto no aparcadoiro da área comercial da rúa Chantada, e o 5 de agosto no cruce da rúa Florida con rúa Calvo Sotelo. As accións informativas realizaranse de 10:30 a 13:30 horas.•
Cargando ...
