O Concello de Chantada, a través da concellaría de Servizos Sociais, levou a cabo entre setembro e xuño o programa “Actívate no Rural”, que ofrece actividades físicas e deportivas ás parroquias interesadas. Este ano, 13 parroquias participaron no programa: Nogueira, Sabadelle, Merlán, Requeixo, Argozón, Muradelle, Laxe, Brigos, Veiga, Mariz, Santa Cruz de Viana, San Cristovo e Arcos.
O obxectivo do programa é mellorar a actividade física, fomentar as relacións sociais e proporcionar apoio emocional. “Trátase de implementar boas prácticas que melloren a calidade de vida e que perduren no tempo”, explicou o alcalde de Chantada, Manuel Lorenzo Varela.
As actividades realizábanse dúas veces por semana en cada parroquia, con tres monitores das escolas deportivas. Este ano, o Concello aumentou o número de sesións, beneficiando a 200 persoas. “Todos os participantes mostraron a súa satisfacción tanto co programa como cos monitores”, afirmou María Cándido Carnero, concelleira de Servizos Sociais e Benestar.
O programa “Actívate no Rural” regresará en setembro con novas actividades para todos os públicos.•
