O Concello de Sober anunciou a súa colaboración na organización da ruta ciclista Santa Cruz Bike 2024, que se celebrará o 24 de agosto. A presentación do evento tivo lugar o pasado sábado e contou coa presenza de diversas autoridades e responsables da proba.
Na presentación participaron o alcalde de Sober, Luis Fernández Guitián; Nemesio Rodríguez, representando á comisión de festas de Santa Cruz de Brosmos; Aarón Vázquez, director da proba e responsable do club ciclista Ribeira Sacra; Alejandro Araújo, director técnico da proba de Biciracing Monforte; e Adrián González, encargado da seguridade. O evento foi conducido por Anabel Pérez.
Durante a presentación, todos os intervenientes subliñaron a importancia desta cita deportiva para a Comarca, que se ten convertido nun referente neste tipo de probas, atraendo participantes non só de Galicia senón tamén das comunidades veciñas. Agradeceron tamén o apoio dos numerosos voluntarios e patrocinadores, sen os cales a celebración do evento non sería posible.
Aínda que o trazado da proba non se desvelou, mantendo a tradición de mantelo en segredo ata a semana anterior ao evento, fíxose fincapé en que incluirá sendeiros que garantirán o gozo dos participantes. Entre as novidades desta edición destaca o incremento do número de participantes permitidos, que ascende a 200, e a celebración da proba nun sábado, facilitando que os ciclistas poidan quedarse e participar nas festas patronais do pobo, nas que se realizarán diferentes sorteos.
Ademais, a seguridade foi un punto clave no discurso de clausura, onde se mencionou que a organización está traballando intensamente para que os sendeiros estean en óptimas condicións para a proba. Animouse a todos os afeccionados ao ciclismo de montaña a participar.
Para máis información sobre o evento, pódese consultar o Facebook de Biciracing Monforte.•
Cargando ...
