Foto GPBNG.
O Pleno da Deputación de Lugo aprobou por unanimidade unha moción presentada polo BNG para solicitar maiores investimentos e unha mellor xestión do regadío do Val de Lemos. A proposta, defendida polo portavoz nacionalista Daniel García, establece como prioridades a renovación e limpeza das canles de regadío, a creación dun censo para a xestión eficiente dos cobros, a condonación da débeda ás comunidades de regantes e a realización dunha parcelaria ou agrupación de fincas nas zonas afectadas pola canle.
Na súa intervención, García destacou a importancia de que “o acordo do pleno se materialice nas decisións de socialistas e populares nas institucións en que gobernan e se desenvolvan as actuacións necesarias para aproveitar as oportunidades que ofrece o Val de Lemos para o sector primario”. A moción insta tanto ao goberno estatal como ao autonómico a tomar medidas inmediatas para mellorar a situación das infraestruturas de regadío na comarca.
A iniciativa no pleno da Deputación de Lugo forma parte dunha serie de accións que o BNG está a desenvolver para chamar a atención sobre a problemática do regadío no Val de Lemos. O partido nacionalista tamén presentou propostas nos concellos da comarca, no Parlamento Galego e no Congreso dos Deputados, insistindo na necesidade de que as institucións competentes atendan estas demandas.•
