A Deputación de Lugo vén de comezar os traballos de rehabilitación do firme dun tramo da estrada LU-P-5810, que conecta Eirexafeita con Cazón, no concello do Saviñao. Esta intervención, que afecta a un tramo de case 7 quilómetros desde o inicio da estrada, conta cun investimento de preto de 80.000 euros.
As obras inclúen a reapertura de cunetas, a reparación de puntos deteriorados e a repavimentación do firme. A empresa encargada de executar os traballos é Fevisa Vías y Obras SL, e o prazo de execución estimado é dun mes. Esta mellora é fundamental para garantir a circulación en condicións de seguridade e comodidade para os usuarios desta vía, que serve a varias parroquias do municipio.
OUTRAS ACTUACIÓNS NO SAVIÑAO
Ademais desta intervención, a Deputación está a realizar outras actuacións no concello do Saviñao. Na estrada LU-P-4202, que conecta Pacios e Currelos por Aldosende, estanse executando obras de mellora entre os puntos quilométricos 3,250 e 5,000. Cun investimento de preto de 80.000 euros, estes traballos inclúen a reapertura e limpeza de cunetas e a pavimentación dos puntos deteriorados con aglomerado en quente.
A maiores, a Deputación sacou a licitación as obras de acondicionamento da LU-P-5806 por 115.400 euros. Esta vía une a parroquia de Freán coa estrada autonómica LU-617 e será mellorada nun tramo de máis de 8 quilómetros. Os traballos, cun prazo de execución de dous meses, incluirán a reapertura de cunetas, a reparación de afundimentos e a repavimentación do firme.
Este proxecto é especialmente relevante para a zona da Ribeira Sacra, xa que esta estrada dá acceso a importantes recursos turísticos, como a contorna de Belesar e o antigo palacio episcopal de Diomondi, que actualmente funciona como albergue de peregrinos na ruta xacobea do Camiño de Inverno.•
