Fotos ARQUIVO.
O Concello de Sarria vén de recibir a confirmación dunha importante subvención do Instituto para a Diversificación e Aforro da Enerxía (IDAE) por un importe total de 2.943.955,41 euros. Esta axuda, que será destinada a compensdar o investimento feito na renovación do alumeado público do municipio, representa a maior subvención xamais executada en Sarria.
O alcalde de Sarria, Claudio Garrido, valorou esta nova a través das súas redes sociais, lembrando o contexto no que se desenvolveu este proxecto. Garrido destacou a oposición que enfrontou durante o proceso, sinalando que “o lema do PP-Sarria era ‘os valenciáns lévanos os cartos dos sarriáns’, un slogan que acompañaron co voto en contra de todo o relacionado con este servizo eléctrico”. O Alcalde de Sarria, tamén lembrou e criticoou a postura dos concelleiros do socialistas do PSOE-Sarria, quen, segundo di, “foron fieis e leais compañeiros da oposición a esta importante obra”.
O alcalde subliñou o aforro significativo que esta actuación supuxo para o municipio. En novembro de 2021, o contrato asinouse cun importe anual de 645.245,36 euros, o que xa representaba un aforro inicial de máis de 150.000 euros ao ano respecto ao gasto previo, que superaba os 800.000 euros anuais.
A revisión de prezos para o período comprendido entre novembro de 2023 e outubro de 2024 establece un custo anual de 636.651,20 euros. Este importe é inferior ao pagado no ano 2022, o que, segundo Garrido, “pón de manifesto que en 2024 os sarriáns pagarán 8.594,16 euros menos pola enerxía eléctrica do alumeado público e edificios municipais, así como polo combustible de calefacción e frío, en comparación co ano 2022”.
Claudio Garrido concluíu resaltando a calidade do novo servizo de alumeado e do servizo de mantemento, que, na súa opinión, “son evidentes para todos os sarriáns”. A confirmación desta subvención, segundo o rexedor, reafirma o éxito da xestión deste proxecto, a pesar das críticas recibidas ao longo do seu desenvolvemento.•
