Haberá presenza da Policía Nacional, Garda Civil, Emerxencias, Protección Civil, Bombeiros e Policía Local
A Sala de Xuntas do Concello de Monforte acolleu esta semana a reunión ordinaria da Xunta Local de Seguridade. O encontro, presidido polo Alcalde José Tomé Roca e a Subdelegada do Goberno en Lugo, María Isabel Rodríguez, contou coa presenza de representantes da Policía Nacional, Garda Civil, Dirección Xeral de Emerxencias, Protección Civil, Bombeiros e Policía Local.
A xuntanza tivo como obxectivo organizar o dispositivo de seguridade para as Festas Patronais, para as que se espera unha gran afluencia de visitantes. Tomé e Rodríguez destacaron a presenza constante dos Corpos e Forzas de Seguridade para garantir a seguridade dos veciños e visitantes, subliñando o éxito da colaboración institucional en edicións anteriores.
Os dispositivos de seguridade previstos inclúen un plan coordinado entre a Policía Nacional e a Policía Local para asegurar a tranquilidade cidadá, manter a orde pública e responder eficazmente a posibles incidentes. A Garda Civil colaborará na periferia e nos principais accesos á cidade, realizando controis de velocidade, alcoholemia e outras substancias.
Ademais, unha patrulla da Policía Autonómica centrarase na prevención do consumo excesivo de alcol nas áreas de maior concentración de persoas. O Consorcio de Bombeiros tamén participará na seguridade, especialmente durante os fogos artificiais de San Vicente o 15 de agosto e os fogos do río o 16 de agosto.
O Alcalde José Tomé valorou positivamente a reunión, destacando o espírito de colaboración entre os distintos corpos de seguridade. Anunciou tamén a celebración dunha mesa técnica nos para ultimar detalles do dispositivo de seguridade para as Festas Patronais.•
Cargando ...
