O mercado laboral galego continúa a mellorar, situándose en 118.045 persoas desempregadas
O mercado laboral galego continúa coa súa tendencia positiva, acadando a cifra de 118.045 persoas desempregadas en xullo, a máis baixa desde que hai rexistros en 1996. Este dato foi destacado polo conselleiro de Emprego, Comercio e Emigración, José González, durante a súa visita a un dos Polo de emprendemento e apoio ao emprego da Xunta, onde realizou unha valoración dos datos actuais.
Galicia é a segunda comunidade autónoma con maior redución de paro nun ano, cunha baixada do 7,38%, superando en 2,61 puntos a diminución estatal, que se situou no 4,77%. Galicia é a segunda comunidade que máis incrementou as afiliacións á Seguridade Social no último mes, sumando máis de 8.500 persoas, alcanzando un total de 1.093.374 afiliados.
O conselleiro José González subliñou que o paro caeu en termos anuais nas catro provincias e nas sete grandes cidades. A diminución abarcou todos os sectores, así como colectivos prioritarios nas políticas activas de emprego da Xunta, como son as mulleres, os menores de 30 anos e os parados de longa duración.
Por sectores, a maior baixada de desemprego foi no sector primario (-11,93%), seguido da construción (-11,47%) e da industria (-11,25%). En canto aos colectivos prioritarios, o desemprego descendeu nas mulleres (-7,96%), nos menores de 30 anos (-5,32%) e nos parados de longa duración (-6,05%). A cifra de desempregados xuvenís alcanzou o nivel máis baixo desde que se teñen rexistros (2005), e a de mulleres desempregadas é a máis baixa para un mes de xullo.
En termos mensuais, o paro mantívose practicamente estable en Galicia respecto ao mes de xuño, cun lixeiro incremento. Non obstante, o dato positivo vén dado polo aumento das afiliacións á Seguridade Social, situando a Galicia como a segunda comunidade autónoma con maior subida no último mes.
O conselleiro destacou que o Goberno galego continúa a implementar medidas para xerar máis e mellor emprego de calidade, tanto por conta propia como por conta allea. Estas accións baséanse no diálogo social cos principais axentes socioeconómicos e buscan afrontar retos como a falta de man de obra, mellorando a inserción laboral dos galegos, especialmente daqueles con maiores dificultades para atopar emprego, como os parados de longa duración.
Entre as medidas adoptadas, José González mencionou a modernización do Servizo Público de Emprego a través da ferramenta de Intelixencia Artificial, EMi, que facilita casar oferta e demanda laboral, incrementando así as oportunidades de emprego para as persoas que realmente desexan traballar.
Para impulsar o emprego por conta propia, o Goberno galego está a despregar a Rede de polos de emprendemento, que actualmente conta con 14 oficinas, cunha previsión de ampliarse ata 15 proximamente. Estas oficinas proporcionan apoio integral a emprendedores, fomentando a creación de novos negocios e fortalecendo o tecido empresarial galego.
O conselleiro rematou destacando a importancia de continuar traballando en colaboración cos axentes sociais e económicos para seguir mellorando as cifras de emprego en Galicia.•
