A Terra de Lemos foi a comarca máis seca de Galicia en xullo, con menos de 4 litros por metro cadrado de precipitacións
Galicia viviu un mes de xullo atípico, con temperaturas medias 1,1 graos superiores ao valor climatolóxico normal para esta época. Así se recolle no avance do informe climatolóxico mensual elaborado por MeteoGalicia, presentado esta mañá pola conselleira de Medio Ambiente e Cambio Climático, Ángeles Vázquez.
Segundo explicou Vázquez, o mes de xullo estivo marcado por tres períodos claramente diferenciados. A primeira semana comezou cun tempo seco e soleado, con temperaturas que se mantiveron dentro dos valores esperados para esta época do ano. Con todo, a partir do 6 de xullo, o clima deu un xiro, e as borrascas tomaron protagonismo, facendo que o tempo fose máis húmido e fresco do habitual.
A situación meteorolóxica mudou novamente a partir do 21 de xullo, cando o sol e o calor intenso foron os protagonistas. Este aumento das temperaturas levou á activación de avisos por calor en coordinación coa Consellería de Sanidade, debido aos episodios de calor extremo. De feito, o día máis caloroso do mes foi o 23 de xullo, cando se superaron os 40ºC en varios puntos da comunidade. A máxima absoluta rexistrouse no concello ourensán da Arnoia, con 41,8ºC.
A pesar de que xullo adoita ser o mes máis seco en Galicia, este ano, as frontes entre o 6 e o 20 de xullo deixaron unha cantidade de choivas superior á habitual, equilibrando así o balance pluviométrico do período. En concreto, o mes rematou cun 3% máis de precipitacións do esperado, segundo os rexistros das estacións meteorolóxicas galegas no período de referencia 1981-2010. Este dato permite considerar que xullo foi un mes dentro da normalidade en canto ás chuvias, cun promedio de 44 litros por metro cadrado.
Non obstante, a análise por zonas revelou unha gran variabilidade nas precipitacións rexistradas. As comarcas máis húmidas foron as de Muros, onde se recolleron preto de 162 litros por metro cadrado, mentres que as máis secas foron as da Limia e Terra de Lemos, con menos de 4 litros por metro cadrado en ambos casos.
De cara ao futuro, a conselleira Ángeles Vázquez adiantou que os principais centros meteorolóxicos mundiais, como Copernicus en Europa e a NOAA nos EEUU, prognostican un agosto máis cálido e seco do que é habitual. Aínda así, Vázquez lembrou que as previsións estacionais non teñen unha alta fiabilidade en Galicia, debido ás influencias cruzadas atlánticas, continentais europeas e africanas, que provocan unha alternancia de períodos cálidos e secos con outros máis frescos e húmidos, tal e como se viu no pasado mes de xullo.
Desta maneira, Galicia enfronta un mes de agosto cunha previsión de temperaturas elevadas e posibles episodios de seca, mantendo a necesidade de estar atentos ás actualizacións meteorolóxicas e ás recomendacións das autoridades competentes.•
