O pasado 28 de xullo, Monforte de Lemos acolleu a terceira proba da Copa Galicia de Slalom, reunindo a 85 palistas de toda Galicia nas augas do río Cabe. Esta competición, organizada polo Club Quixós de piragüismo e co apoio do Concello de Monforte e a Deputación de Lugo, destacou polo alto nivel dos participantes e a excelente organización.
Os equipos procedentes de Dumbría, Mondariz, Salvaterra, Tomiño, Castrelo de Miño e Monforte de Lemos competiron en diversas categorías, tanto en masculino como en feminino, incluíndo Infantil C1, Alevín C1, Infantil K1, Alevín K1, Benxamín K1 e Prebenxamín K1. O Club Teixugos de Tomiño proclamouse vencedor por equipos, con 261 puntos, seguido do Club Quixós de Monforte, que acadou 252 puntos, e do club de Dumbría, que completou o podio con 170 puntos.
A entrega de medallas e premios logo de rematada a competición tivo lugar no paseo do Malecón, onde o alcalde de Monforte, José Tomé Roca, acompañado polo concelleiro de Deportes, José Manuel Mougán, fixo entrega dos galardóns aos mellores clasificados da xornada.
Pero as boas novas para o Club Quixós non remataron aí. O luns 5 de agosto, o alcalde de Monforte, José Tomé, homenaxeou aos cinco deportistas do club que destacaron no Campionato de Europa de Augas Bravas Junior e Sub-23, celebrado en Dallenwil, Suíza. Noa Díaz Quintián e Ximena Prats Moreiras brillaron especialmente, acadando a medalla de bronce na modalidade C1 patrullas e na modalidade clásica C2.
Efrén Álvarez Vázquez, Gabriel Rodríguez López e Jacobo Rodríguez López completaron a destacada actuación do club monfortino en Suíza. No acto, celebrado no Salón de Plenos da Casa do Concello, José Tomé destacou a importancia destes éxitos para a proxección internacional de Monforte e reiterou o compromiso do goberno municipal co deporte local. Ademais, recordou a posta en marcha en 2022 dunha liña de axudas dotada con 12.000 euros destinada a apoiar os clubs que compiten en campionatos nacionais e internacionais.
O alcalde tamén recibiu un emotivo agasallo por parte dos deportistas do Club Quixós: un póster enmarcado coas súas fotografías no Campionato de Europa, asinado por todos os participantes. Tomé, visiblemente emocionado, agradeceu o xesto e animou aos deportistas a seguir traballando para acadar novos éxitos que sigan situando a Monforte na elite do deporte.•
Cargando ...
