O Concello de Chantada, a través da concellaría de Servizos Sociais, organizou desde febreiro ata xuño cursos de pintura destinados a persoas maiores. As actividades tiveron lugar no Edificio Multiusos, con clases os mércores de pintura ao óleo e os venres de pintura en tela, en horario de 16:30h a 19:30h.
Os cursos, nos que participan 49 persoas, continuarán desde setembro ata decembro, culminando cunha exposición dos excelentes traballos realizados cos asesoramento das súas monitoras. O Programa de Pintura, que tivo un parón durante a pandemia, retomouse ampliando a súa duración. “Despois desta etapa tan dura, sobre todo para os maiores, decidiuse ofertar a actividade case todo o ano coa intención de reverter a situación de soidade e malestar, converténdose case en grupos de apoio e unha maneira de volver a socializar e relacionarse. Así nolo trasladaron as persoas participantes, asegurando que a actividade repórtalles importantes beneficios”, sinalou o alcalde de Chantada, Manuel Lorenzo Varela.
“A pintura xera unha gran satisfacción persoal ademais de innumerables beneficios para a saúde e o benestar. Con este tipo de propostas poténciase a creatividade, trabállase a imaxinación e mellórase a autoestima, pero principalmente favorece a comunicación xa que permite compartir tempo con outras persoas, socializar e conversar”, concluíu o rexedor.•
