Foto RTMQ.
Os veciños da parroquia de Santa Baia de Bendollo celebraron un emotivo acto relixioso coa procesión da Virxe das Neves, que volveu á recentemente restaurada Capela das Neves despois de 75 anos de estar na igrexa parroquial. Esta celebración tivo lugar no propio día da Virxe das Neves, e reuniu a numerosos feligreses que participaron na procesión.
A Virxe foi trasladada desde a igrexa parroquial de Bendollo ata a capela nun carro tradicional tirado por bois, seguindo unha tradición que remonta décadas atrás. O percorrido foi acompañado polos veciños, que quixeron ser testemuñas deste momento histórico e celebrar a recuperación dun dos seus espazos de culto máis queridos.
A historia da Capela das Neves está chea de incógnitas. Segundo explicou o cura da parroquia, Jesús Ríos, descoñécese a data exacta da súa construción, aínda que se barallan hipóteses baseadas en referencias históricas. Unha destas apunta á doazón da igrexa de Bendollo ao bispo de Astorga por parte do rei Alfonso IX no ano 1215, o que podería estar relacionado coa edificación da capela e a creación da talla da Virxe, que o Inventario do Patrimonio Artístico de España sitúa no século XIII.
A primeira referencia documental sobre a imaxe da Virxe das Neves data do ano 1687, segundo unha acta de visitación que menciona as obrigas do veciño Bartolomé da Vila respecto ao culto da Virxe. En canto á capela, unha visita do bispo de Astorga, José Aparicio Navarro, realizada o 5 de xullo de 1713, ordenou que se mantivese en bo estado e ben ornamentada para garantir que nela se puidera celebrar a misa con dignidade.
Esta procesión, cargada de simbolismo, marca non só a restauración física da capela, senón tamén a revitalización dunha tradición que une á comunidade de Santa Baia de Bendollo en torno á historia e súa fe.•
