Foto: MONTERO.
A XXIV Mostra de Artesanía Artelemos, inaugurada o pasado luns 5 de agosto polo Alcalde José Tomé Roca, entra na súa recta final. Con só dous días restantes, a rúa Cardenal de Monforte congrega a 30 profesionais que expoñen e venden as súas creacións, procedentes de toda Galicia e outras partes de España.
A feira, que se consolida como un evento clave dentro do Programa Cultural de Verán do Concello, está a ter un notable éxito de público e vendas. Desde a súa recuperación en 2015, Artelemos medrou en número de participantes e días de celebración, pasando de cinco a seis días o ano pasado debido á alta demanda e interese tanto de artesáns como de visitantes.
Os asistentes poden gozar dunha ampla variedade de produtos artesanais, desde ourivaría e cestería ata cerámica e coiro, todos eles elaborados por artesáns acreditados que aseguran a calidade e autenticidade das súas pezas. Ademais, hai demostracións diarias de técnicas artesanais e obradoiros para os máis pequenos, que se están a celebrar con gran afluencia de público.
O Alcalde anima a todos os monfortinos e visitantes a achegarse a esta mostra única, subliñando que “apostar pola artesanía é apostar polos nosos artesáns, polo produto local de calidade e polas nosas tradicións.” Artelemos non só dinamiza os oficios artesanais locais, senón que tamén reforza a promoción turística de Monforte e a comarca de Lemos, converténdose nun atractivo máis para os visitantes.
A mostra está aberta de 10 a 14 horas pola mañá e de 18 a 22 horas pola tarde. Non perda a oportunidade de descubrir e adquirir pezas únicas e de gran valor artesanal, e de participar nas actividades que aínda se celebrarán ata o peche da feira este sábado 10 de agosto.•
