Miguel Gallego foi elixido presidente de Novas Xeracións da provincia de Lugo no congreso que a formación celebrou este venres 6 de setembro. Gallego, de 26 anos, e portavoz do PP no municipio de Samos, comprometeuse a liderar un equipo renovado, composto por mozos e mozas cunha media de idade de 23 anos, procedentes de distintas comarcas e con diversos intereses e formacións. O novo presidente destacou a importancia do traballo en equipo e fixo fincapé na necesidade de reforzar as bases do Partido Popular da provincia.
Durante o seu discurso, Gallego agradeceu o apoio recibido e anunciou que traballará desde a humildade para achegar o proxecto político do PP aos máis novos. Entre os obxectivos principais, Gallego avanzou a promoción de novas agrupacións locais, o incremento da afiliación, e a colaboración con alcaldes e portavoces na organización de eventos destinados á xuventude. Tamén subliñou a importancia dunha estratexia de comunicación activa nas redes sociais e a necesidade de manter reunións periódicas para fomentar a participación e fortalecer os lazos internos da organización.
Elena Candia, presidenta provincial do PP de Lugo, eloxiou a valentía de Miguel Gallego e Nicole Grueira, presidenta de Novas Xeracións de Galicia, por asumir responsabilidades e liderar candidaturas nos seus concellos nas pasadas eleccións municipais. Candia destacou a implicación dos mozos e mozas neste congreso, sinalando que “Lugo ten futuro” e instou ao novo equipo a traballar desde a unidade e a renovar as estruturas xuvenís.
Beatriz Álvarez Fanjul, presidenta nacional de Nuevas Generaciones, subliñou que a renovación é fundamental nunha organización xuvenil, e afirmou que Novas Xeracións de Galicia é un exemplo de adaptación e proximidade ás necesidades dos mozos galegos. Pola súa banda, Nicole Grueira agradeceu o labor do equipo saínte e alentou á nova directiva a traballar con compromiso e ilusión pola xuventude lucense.
O novo equipo directivo de Novas Xeracións da provincia de Lugo está conformado por unha vintena de mozos e mozas, entre os que destacan Cristina Fernández como secretaria xeral e Eyner Fernández como secretario de organización. Con esta nova dirección, Gallego e o seu equipo afrontan o reto de fortalecer a presenza de Novas Xeracións no ámbito local e de promover os valores do Partido Popular entre a mocidade lucense.
