A Volta a Galicia 2024 arrincou con éxito en Sarria, que acolleu as dúas primeiras etapas desta competición de ciclismo Elite Sub-23. A localidade lucense, reafirmou o seu protagonismo no panorama ciclista galego ao ser o punto de partida e chegada das xornadas iniciais, celebradas o 12 e 13 de setembro.
A presentación oficial das etapas lucenses tivo lugar na rúa Maior de Sarria, nun acto no que participaron o vicepresidente da Deputación de Lugo, Efrén Castro, e o presidente da Federación Galega de Ciclismo, Juan Carlos Muñiz. Castro destacou a importancia do evento para a dinamización económica e social da comarca, grazas ao influxo de público e á loxística que a proba trae consigo, ademais de poñer en valor a riqueza natural e patrimonial da zona.
A primeira etapa, unha contrarreloxo individual de 7,1 quilómetros, percorreu as rúas de Sarria, con saída na rúa da Liberdade e meta na rúa Maior, xusto fronte á Igrexa de San Salvador. A proba reuniu aos mellores ciclistas das categorías Sub-23 e Elite, nun percorrido que combinou a paisaxe urbana coa contorna natural da localidade, atraendo a numeroso público que se congregou ao longo do trazado.
A segunda etapa, cun trazado de 160 quilómetros, saíu tamén da rúa da Liberdade en Sarria, e percorreu un circuíto que incluíu concellos das comarcas de Sarria e Lugo, como Samos, Láncara, O Páramo, O Corgo, Castroverde, Baralla e Lugo (Nadela). Con dous portos de terceira categoría en Montán (Samos) e Sobrado (Baralla), o itinerario destacou polo seu perfil de media montaña, combinando tramos rápidos con zonas máis técnicas e “rompepernas”. A saída neutralizada iniciouse ás 12:00 horas, marcando o comezo dunha intensa xornada.
Nesta edición, a Volta a Galicia consta de catro etapas que percorren máis de 450 quilómetros polas provincias de Lugo, Ourense e Pontevedra, finalizando en Sanxenxo. Con 112 ciclistas de 16 equipos participantes, incluíndo oito formacións galegas e outras de diferentes comunidades españolas e mesmo internacionais, a proba mantense como un trampolín esencial para os ciclistas que aspiran a dar o salto ao profesionalismo.
A celebración da Volta a Galicia en Sarria non só pon en valor o potencial da vila como anfitrioa de eventos de grande envergadura, senón que tamén contribuíu a fortalecer o seu vínculo co ciclismo e a proxección turística da comarca, mostrando os atractivos paisaxísticos e culturais que caracterizan esta zona de Galicia.
Pola súa parte, o conselleiro de Deportes, Diego Calvo, durante a presentación da Volta a Galicia 2024 que tivo lugar en Santiago, destacou a importancia de eventos como a Volta a Galicia para a promoción turística e deportiva de Galicia.
IMPORTANTE PARTICIPACIÓN
Na edición deste ano están a competir 18 equipos, oito deles galegos. Trátase de Equipo Cortizo, Supermercados Froiz, Vigo Rías Baixas, High Level G. Tormo, Lasal Cociñas-Craega, Team Oiense Escuela Estévez, Retelec Ambilampe e Club Ciclista Vigués. A eles súmanse formacións doutras comunidades como Madrid, Navarra, Estremadura, Cantabria, Castela e León e Aragón, e mesmo doutros países como Colombia, Francia ou Portugal.•
Cargando ...
