A SD Sarriana comezou a tempada de Terceira RFEF cunha vitoria destacada ao impoñerse por 0-1 ao Arosa na Lomba, ante un dos históriocs da categoría. O equipo de Jaime Paz logrou sumar os tres puntos grazas a un solitario gol de Santi Gegunde, que o ano pasado xogaba precisamente no conxunto vilagarcián. A Sarriana mostrou unha gran solvencia defensiva e unha notable capacidade de adaptación ao partido, confirmando as boas expectativas que rodean ao club esta tempada.
O encontro comezou cun Arosa moi activo en ataque, xerando perigo dende os primeiros minutos con Romay como protagonista. A pesar das súas insistentes chegadas, a defensa da Sarriana soubo manterse firme, e no minuto 10 respondeu cunha clara ocasión de Boedo a balón parado que se marchou por enriba do traveseiro.
O único gol do encontro chegou mediada a primeira parte, cando Santi Gegunde aproveitou un balón na frontal da área para batir a Álex Vila cun disparo raso e axustado ao poste. A partir de aí, o Arosa seguiu presionando, pero atopouse cunha defensa ben ordenada e cun Javi Liz seguro baixo paus.
Con esta vitoria, a Sarriana non só suma tres puntos valiosos, senón que reafirma a súa posición como un dos favoritos para pelexar polo ascenso. A recente incorporación de xogadores de calidade á súa plantilla reforza as expectativas dunha boa tempada.
O próximo partido da SD Sarriana será o 15 de setembro, cando recibirá ao CD Valladares en A Ribela ás 18:00 horas, coa intención de manterse nos postos nobres da clasificación.•
