O Diario Oficial de Galicia (DOG) vén de publicar dúas ordes de axudas da Consellería de Emprego, Comercio e Emigración, cun orzamento total de 3,4 millóns de euros, dirixidas a apoiar a contratación e prórroga de axentes de emprego nos concellos e entidades sen ánimo de lucro. Esta iniciativa pretende fortalecer a Rede de Técnicos de Emprego de Galicia, co obxectivo de impulsar políticas activas de emprego que fomenten a creación de novas empresas e a inserción laboral de colectivos vulnerables, como persoas con discapacidade ou en risco de exclusión social.
Do orzamento total, 2,2 millóns de euros destinaranse á convocatoria de axentes de emprego e desenvolvemento local nos concellos, mentres que 1,2 millóns de euros serán para axentes en entidades sen ánimo de lucro. En total, prevese financiar a contratación de máis de 200 axentes, a maioría nos concellos, ademais de aproximadamente 40 axentes en entidades sen ánimo de lucro.
As funcións principais destes axentes inclúen a promoción da actividade empresarial local, actuando como promotores e asesores de proxectos empresariais, así como como prospectores de mercado. Desta forma, contribuirán á dinamización da economía local e á xeración de novas actividades no ámbito rural. Ademais, colaborarán na promoción da igualdade de oportunidades e no acompañamento técnico para o inicio de proxectos empresariais, asesorando sobre a viabilidade técnica, económica e financeira dos mesmos.•
Cargando ...
