A Vicepresidencia da Deputación de Lugo, a través da súa área de Rural, intensificará o seu apoio á Asociación de Criadores da Raza Porcina Celta (Asoporcel) coincidindo co 25 aniversario da entidade. Así se acordou nun recente encontro de traballo entre o deputado provincial Daniel García e representantes da asociación, no que se concretou unha colaboración económica excepcional de 12.000 euros para financiar accións de promoción do consumo da carne de Porco Celta.
O deputado salientou a importancia de apoiar a demanda deste produto, destacando que “a viabilidade económica das granxas depende en gran medida da valorización das calidades gastronómicas da carne”. Neste sentido, a colaboración pretende reforzar o traballo que Asoporcel vén realizando para promocionar a raza en feiras, mercados de proximidade e degustacións, como as desenvolvidas recentemente na Praza de Abastos de Lugo.
A asociación, creada en 1999, leva 25 anos traballando na recuperación e conservación desta raza autóctona, así como na certificación dos produtos baixo o selo 100% Raza Autóctona Porco Celta, recoñecido como sinónimo de calidade e autenticidade nos mercados.•
Cargando ...
