O Concello acometerá a pavimentación do entorno do Mercado Gandeiro e a mellora do firme no camiño municipal de A Babela, con previsión de finalización das obras a finais de outubro
Na xunta de goberno celebrada o pasado luns 23 de setembro, o Concello de Monforte de Lemos, presidido polo alcalde José Tomé Roca, aprobou a adxudicación de dúas importantes actuacións en infraestruturas urbanas e rurais. As obras adxudicadas céntranse na mellora do entorno do Mercado Gandeiro e no firme do camiño municipal de A Babela, que suman un investimento total de 217.000 euros (216.938,48 euros) e contan cun prazo de execución de un mes desde a firma da acta de replanteo.
A primeira das actuacións adxudicadas refírese á pavimentación do entorno do Mercado Gandeiro de Monforte, unha zona de gran importancia tanto para a actividade económica local como para a veciñanza, especialmente os días de feira. Esta obra foi adxudicada á empresa Misturas S.A. por un importe de 152.193,80 euros, que se inclúen dentro dun orzamento total de 177.787,13 euros, IVE incluído. O alcalde José Tomé subliñou que a intervención «responde á necesidade de renovar o firme dunha área moi utilizada e de mellorar zonas que actualmente non están pavimentadas, co fin de ofrecer un mellor servizo tanto aos usuarios como aos veciños de Monforte».
A intervención no Mercado Gandeiro abranguerá unha superficie total de 12.725 metros cadrados, cunha lonxitude de vías de 1.200 metros e un ancho medio de 10,60 metros. O proxecto inclúe a colocación dunha nova capa de rodadura de aglomerado en quente de 5 centímetros de espesor. Ademais, esta actuación enmárcase dentro dun plan máis amplo de mellora das infraestruturas do Mercado Gandeiro, que xa contemplou no ano 2021 a renovación das cubertas das naves do polbo cun investimento de máis de 70.000 euros, e que continuará este ano coa mellora doutras dúas naves.
A segunda actuación adxudicada pola Xunta de Goberno afecta ao camiño municipal de A Babela, que conecta o barrio de Babela en Distriz coa Depuradora de Piñeira, xunto á N-120 e á estrada de Sober.
A empresa Misturas S.A. tamén se encargará desta obra, cunha adxudicación de 64.744,68 euros, incluíndo un orzamento total de 75.467,12 euros, IVE incluído.
A mellora do camiño de A Babela centrarase na renovación do seu firme ao longo de 1.120 metros, mediante a aplicación dunha capa de aglomerado en quente tipo D-12 de 5 centímetros de espesor. Esta intervención busca mellorar a accesibilidade e a seguridade nesta vía municipal, que é de vital importancia para os residentes e para a conexión coas principais arterias viarias da zona.
As obras, tanto no Mercado Gandeiro como no camiño de A Babela, están programadas para comezar de forma inmediata unha vez asine a acta de replanteo, coa previsión de estar rematadas a finais de outubro ou principios de novembro. Esta celeridade na execución responde á vontade do goberno local de minimizar as molestias aos cidadáns e garantir que as melloras estean dispoñibles canto antes para o uso da poboación.
Estas dúas actuacións son un reflexo do compromiso do Concello de Monforte de Lemos coa mellora constante das infraestruturas locais, tanto en áreas urbanas como rurais. O alcalde José Tomé destacou que estas obras son parte dunha estratexia máis ampla que ten como obxectivo «a revitalización das infraestruturas clave para a economía local e a calidade de vida dos veciños de Monforte». Con estas melloras, o Concello busca non só optimizar o uso das instalacións municipais existentes, senón tamén potenciar a atracción de novos eventos e actividades que contribúan ao dinamismo económico da cidade.•
Cargando ...
