O Concello de Chantada levou a cabo importantes melloras nas infraestruturas do Polígono Industrial dos Acivros, grazas á subvención de 104.000 euros concedida pola Consellería de Industria. O proxecto, cun orzamento total de pouco máis de 111.000 euros, permitiu acometer a reparación de tres viais, un no interior do polígono e dous nos accesos principais.
As obras foron adxudicadas á empresa Fevisa, que as executou nun prazo dun mes, tras comezar a finais do pasado agosto. A actuación consistiu na aplicación de aglomerado en quente, co obxectivo de mellorar o acceso e o servizo das parcelas xa vendidas e das empresas en funcionamento.
O alcalde de Chantada, Manuel Lorenzo Varela, destacou a importancia destas obras para continuar potenciando o polígono industrial e fomentar o asentamento de novas empresas que xeren emprego na comarca. Ademais, lembrou que o concello está tramitando a ampliación do polígono, pendente da aprobación dos informes medio ambientais necesarios para negociar novas parcelas empresariais.
Estas actuacións en infraestruturas viarias forman parte dun plan de mellora máis amplo que inclúe tamén outros proxectos, como a implantación de iluminación pública eficiente ou a instalación de sistemas de seguridade no polígono industrial.•
Cargando ...
