Sarria volverá vibrar coa música independente grazas ao Esmorga Fest 2024, que se celebrará os días 25 e 26 de outubro. A novena edición deste evento reunirá unha vintena de bandas nacionais e internacionais, confirmándose nomes como Atención Tsunami, Nudozurdo, Los Manises, Perro, Músculo e Mourn, que presentará o seu novo disco The Avoider (2024). Entre as novidades destacan os canadenses Ghostwoman e os portugueses Maquina, dous dos grupos internacionais máis agardados.
Os concertos dividiranse entre a sala Litmar e a Sociedade Cultural La Unión, onde o acceso será gratuíto. O venres as actuacións terán lugar só en Litmar, mentres que o sábado se repartirán entre ambos espazos.
Este ano, o Esmorga Fest ofrece como novidade a opción de mercar entradas por día, á vez que continúa a bo ritmo a venda de abonos. Estes, dispoñibles por 45 euros na web do festival, esgotaron xa as súas tandas a prezos especiais.•
