A infraestrutura mellorará o tratamento das augas residuais e permitirá a ampliación do polígono industrial
O Alcalde de Monforte, José Tomé Roca, e o presidente da Confederación Hidrográfica Miño-Sil (CHMS), José Antonio Quiroga, anunciaron o inicio das obras da nova depuradora do Polígono de O Reboredo, durante unha rolda de prensa celebrada no propio polígono. Esta obra, que conta cun orzamento de máis de 4 millóns de euros, permitirá solucionar os problemas actuais de depuración e facilitará a futura expansión do polígono industrial.
O alcalde destacou que esta nova infraestrutura é fundamental para o crecemento industrial de Monforte, permitindo que o polígono alcance os 800.000 metros cadrados, con espazo suficiente para novas empresas. «Hoxe é un día importante para Monforte, xa que a antiga depuradora non tiña capacidade suficiente para as necesidades actuais», sinalou Tomé.
A nova depuradora contará cun sistema modular que se axustará automaticamente á cantidade de residuos a tratar, optimizando así o seu funcionamento e aforrando enerxía. Ademais, permitirá a eliminación dos vertidos no regato do Carballo, mellorando a calidade ambiental da zona, xa que as augas tratadas serán canalizadas ata o río Cabe.
As obras comezarán coa instalación dunha nova tubaxe de 1,5 quilómetros que conectará a depuradora co río Cabe. A maquinaria comezará a traballar a finais de outubro, despois do acopio do material necesario.
Pola súa banda, José Antonio Quiroga resaltou a importancia desta actuación para mellorar a calidade das augas e asegurar o cumprimento dos estándares ambientais. A nova infraestrutura non só mellorará o tratamento das augas residuais do polígono actual, senón que permitirá unha futura ampliación se fose necesario.•
Cargando ...
